Jergilikti turǵyn Astana qalasynyń azamattyq ister jónindegi aýdanaralyq sotyna júginip, JShS-nen (qonaq úı) joǵaltqan tabysy men materıaldyq shyǵyndy óndirý boıynsha talap qoıǵan. Basseın jumysyn qonaq úı qyzmetterin kórsetetin JShS júzege asyrady, dep habarlaıdy Egemen.kz.
Joǵarǵy Sottyń málimetinshe, astanalyq kelinshek qonaqúı basseıninde jaraqat alyp, aıaǵy synǵan. Ol jaraqat alǵan sátten bastap, uzaq ýaqyt boıy emdelgen, oǵan ýaqytsha eńbekke jaramsyzdyq paraǵy ashylǵan.
QR ST 2985-2017 «Haýyz qyzmetteri» halyqqa qyzmet kórsetýdiń ulttyq standartynda basseın qyzmetterin kórsetý kezinde kelýshilerdiń ómiri men densaýlyǵynyń qaýipsizdigi jáne olardyń múlkiniń saqtalýy qamtamasyz etilýi tıis. Qyzmetter qaýipsizdik sharalaryna saı bolýy qajet.
Sotta anyqtalǵandaı, talap qoıýshy basseın aımaǵyna arnaıy rezeńke aıaq kıimsiz kirgizilgen.
«Bul jaýapker kórsetken qyzmet sapasynyń tómendigin kórsetedi. Saldarynan onyń densaýlyǵyna zııan kelgen. Alaıda sot zalal somasyn azaıtý qajet dep sanady. Sebebi qyzmet alýshy basseın aýmaǵynda taıǵanamaıtyn aıaqkıim kııýge qatysty óreskel nemquraılylyǵy dep tanylǵan. Ondaı aıaq kıim kııý kerektigi erejede kózdelmegen», delingen Joǵarǵy Sot habarlamasynda.
Sot materıaldyq zalaldy óteý mólsherin talap qoıýshynyń kinásiniń dárejesine (50%) barabar azaıtqan.
Aıta keteıik, talap qoıý ishinara qanaǵattandyryldy. JShS-nen talap qoıýshynyń paıdasyna 1,1 mln teńge joǵalǵan tabys jáne 160 myń teńgeden astam dári-dármek jáne avıabılet satyp alýǵa ketken shyǵyn óndirilgen. Jaýapkerdiń qyzmet kórsetý kezinde talap qoıýshynyń densaýlyǵyna zııan keltirýdegi kinási ishinara dep tanylǵandyqtan, 50 myń teńge moraldyq zııandy óteý týraly talap ishinara qanaǵattandyrylǵan.
Úkim zańdy kúshine engen joq.