Batys Qazaqstan oblysyndaǵy Qaztalov aýdanynda eki otbasy jańa páterge ıe boldy. Aýdan ákimi Aslanbek Sarqulov úı ıelerine baspana kiltin ózi tabystady.
Memleket basshysy Qasym-Jomart Toqaev «Adal adam – Adal eńbek – Adal tabys» atty Ulttyq quryltaıdyń úshinshi otyrysynda «...Aýyl jáne aýdan ortalyǵynyń turǵyndaryna arnalǵan jańa turǵyn úı baǵdarlamasyn qolǵa alý kerek. Bul rette áleýmettik turǵyda osal toptaǵy jandar úshin nesıe ósimi 7 paıyzdan aspaýy qajet. Sonymen qatar satyp alý quqyǵymen jalǵa beriletin baspana sanyn birneshe ese kóbeıtýdi Úkimetke tapsyramyn», degen bolatyn.
«Aýdan ortalyǵynda qos birdeı baspananyń berilýi – memlekettik baǵdarlama júzege asyp jatqanynyń aıqyn kórinisi. Qazirgi tańda halyqty turǵyn úımen qamtamasyz etý máselesi óte ózekti. Búgin turǵyn úı kezegindegi eki otbasy baspanamen qamtyldy. Jańa shańyraq ıelerine zor densaýlyq, otbasy jylýyn tileımin», dedi aýdan ákimi.
Jańa baspana úıi apatty dep tanylǵan Asylzada Zulqarnaevaǵa jáne 20 jyl eńbek ótili bar, 2012 jyldan beri turǵyn úı kezeginde turǵan bıýdjettik sala qyzmetkeri Shalyqqanym Buırashevaǵa buıyrdy. Aıta keteıik, bul úıler satyp alý quqyǵymen jalǵa berilip otyr.
Qazirgi tańda Qaztalov aýdanynda memlekettik baǵdarlama aıasynda 28 aýylda 116 turǵyn úıdiń qurylysy júrip jatyr. Qurylys sapasyn aýdan ákimi men jergilikti qoǵamdastyq jiti baqylaýǵa alǵan.
Batys Qazaqstan oblysy