Astana qalasy Baıqońyr aýdanynyń BUО́SO-da ájelerge arnalǵan «Ájeler toby» atty jańa klýb ashyldy, dep habarlaıdy Egemen.kz elorda ákimdiginiń baspasóz qyzmetine silteme jasap.
Atalǵan klýb zeınetkerlerge erekshe múmkindikter beredi. Atap aıtqanda, munda ájelerimiz ártúrli is-sharalarǵa qatysyp, ómirlik tájirıbelerin bólise alady.
«Ájeler toby» klýbynyń ashylýyna qolóner úıirmesiniń jetekshisi Balym О́mirzaqova muryndyq boldy. Ortalyqta qolóner úıirmesi 2 jyldan astam ýaqyt jumys istep keledi. Aıta keteıik, Balym Saparhanqyzynan 300-den asa aq jaýlyqty áje dáris alǵan.
Búgin úıirmege jınalǵandarǵa arnap «Oramal ton bolmaıdy, jol bolady» atty sheberlik saǵaty ótti. Klýbtyń jańa músheleri oramal tigýdiń syr-qyryn úırendi. Bes saýsaǵynan óner tamǵan ájelerimiz mýzykalyq ónerlerin de ortaǵa saldy.
Ájelerimiz aldaǵy ýaqytta klýb jumysyn damytýdy josparlap, urpaqtar sabaqtastyǵyn jalǵastyrý úshin jastarmen qarym-qatynas jasaýǵa jáne tájirıbe almasýǵa jaǵdaı jasaıtynyn aıtty.
Aıta keteıik, Baıqońyr aýdanynyń BUО́SO qala zeınetkerlerine tegin qyzmet kórsetedi. Zeınet jasyndaǵy adamdardyń qyzyǵýshylyǵyna qaraı klýbtar, ıoga, psıholog trenıngteri, qolóner úıirmeleri, qazaq jáne aǵylshyn tili sabaqtary, ústel oıyndary men mádenı-oıyn-saýyq is-sharalary uıymdastyrylady.