Jeri shól, kútimdi qajetsinetin kókónis, jemis-jıdek túrleriniń ósýi múmkin emes delinetin Mańǵystaýda shalǵaıdyń shyraıyn keltirip, egin egip, nápaqa taýyp, el násibin arttyryp júrgen eńbekqor jandar az emes.
Mundaı kásip ıeleriniń biri – egin sharýashylyǵyna beıimdelgen sharýa qojalyǵynyń ıesi Jaqsylyq Ibadýllaev. Quryq aýlyna qarasty Qyzylqum jerinde jasaǵan jankeshti eńbeginiń nátıjesinde jylyjaı kásibin óristetip, baý-baqsha ósirýdi jolǵa qoıdy. Qazir 35 gektar alqaptyń 6 gektaryna jemis aǵashtaryn otyrǵyzyp, 3 gektar jer aýmaǵynda jylyjaı kásibin júrgizip keledi.
«2005 jyly 25 gektarǵa jýyq jer alyp, keıin 10 gektar jerdi qosyp, eńbektenip kelemin. Baý-baqshanyń kútimi ońaı sharýa emes. Egin alqabyn jerasty sýymen sýaramyz. Onymen qosa jemis aǵashtary erekshe kútim nátıjesinde jyl saıyn ónim beredi. Ony Aqtaý qalasyndaǵy bazarlarǵa jáne Quryq aýlyna tasymaldaımyz. Kúnine 700 kılo órik pen almany satylymǵa shyǵaramyz. Bul kásibim men úshin asa qymbat.Tabandy eńbektiń nátıjesi janyńa keremet sezim syılaıdy», deıdi «Rysbek» sharýa qojalyǵynyń jetekshisi Jaqsylyq Ibadýllaev.Eńbek qadirin biletin sharýa qojalyǵynda ysyrapqa jol berilmeıdi. Artylǵan nemese merzimi ótip ketken jemisterden arnaıy «keptirilgen ónim» daıyndalady.
«Bul sharýashylyq – Jaqsylyq aǵamyzdyń aq adal eńbeginiń jemisi. Odan bólek, mal azyǵy da qosa daıyndalady. Jumysshy sany tapshy bolǵandyqtan, jumys kózine jastardy jıi tartamyz. Aldaǵy ýaqytta kómekke qoǵamdyq jumyskerler tartylady. О́z tarapymyzdan arnaıy qoldaý kórsetip kelemiz. Qazir aýdan aýmaǵynda 665 sharýa qojalyǵy bar. Onyń ishinde 41-i egin sharýashylyǵymen aınalysady», deıdi Qaraqııa aýdandyq Kásipkerlik jáne aýyl sharýashylyǵy bóliminiń basshysy Sábıt Qusaıynov.
Mańǵystaý oblysy