Qazaqstan Ortalyq Azııadaǵy «Google for Startups» jahandyq kompanııasymen birge akselerator júrgizetin alǵashqy jáne jalǵyz memleket mártebesinde qala bermek. Bıylǵy «Silkway Accelerator 2024» baǵdarlamasyna 238 startap qatysýǵa nıet bildirgen edi. Solardyń 15-i ǵana «Astana Hub» pen «Google for Startups-tyń Silkway Accelerator» atty birlesken baǵdarlamasynyń sońǵy kezeńine ótti. Jobalardy Ortalyq Azııa elderiniń bilikti sarapshylary men «Google for Startups» ókilderinen turatyn arnaıy komıssııa iriktedi.
Úzdikter qatarynda: Qazaqstannyń «ab.ai», «Alaqan», «Beksar», «biny.co», «Car Parking Multiplayer», «CheckDoc», «Courstore», «Grand Mobile», «kook», «Prometei men WeGlobal.a», О́zbekstannyń «Al Chiroq pen UYSOT» jobalary, Qyrǵyzstannyń «Neobis», sondaı-aq Mońǵolııanyń «Lambda Global» startaby bar. Aıta keteıik, atalǵan baǵdarlama Ortalyq Azııa elderinen, Ázerbaıjannan, Grýzııadan, sondaı-aq Mońǵolııadan kelgen startaptarǵa ǵana qoljetimdi.
Júzden júırik dep tanylǵan startaptar óz jobalaryn tanystyryp, aldaǵy josparlaryn talqylaǵan dástúrli «Opening Day» is-sharasyna Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev, «Google for Startups» sarapshylary Asqar Aıtýov pen Olga Skorohodova, baǵdarlamanyń jetekshi trekeri Dmıtrıı Beznosıýk, sondaı-aq elimizdiń IT-qaýymdastyq ókilderi qatysty.
«Qazaqstanǵa, kásipkerler men startaptarǵa arnalǵan mundaı aýqymdy ári mańyzdy bastama úshin seriktesterimiz ben «Google for Startups «kompanııasyna alǵys aıtqym keledi. Baǵdarlamanyń jetistikteri barshylyq. Atap aıtsaq, 1300-den astam jedel iske qosylǵan joba, $400 mıllıonnan astam somaǵa baǵalanǵan 50-ge jýyq startap, sondaı-aq qatysýshylar tartqan $26 mıllıon kólemindegi ortaq ınvestısııa. Bul – atalǵan baǵdarlamanyń aýyz toltyryp aıtarlyqtaı úlken nátıjesi ári bastamasy ǵana. Mınıstrlik tarapynan mundaı jobalarǵa qoldaý kórsetip, uıymdastyrýǵa qajetti barlyq ınfraqurylymdy qamtamasyz etýge umtylamyz», dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
Jańa lektiń ashylý saltanatynda sóz sóılegen «Google» kompanııasynyń Ortalyq Azııa jáne Zakavkazedegi úkimetpen ózara is-qımyl máseleleri jónindegi bólim basshysy Olga Skorohodovanyń aıtýynsha, «Astana Hub» jáne «Google for Startups» birlesken baǵdarlamasy «Silkway Accelerator» Ortalyq Azııada ótkiziletin jobalar arasynda kóshbasshy bolyp qala bermek.
«Búgingi tehnologııany árbirimiz betpe-bet keletin áleýmettik ári ekonomıkalyq máselelerdi sheshýde paıdalaný kerek dep sanaımyz. «Astana Hub»-taǵy áriptesterimizge seriktestik úshin sheksiz rızashylyǵymyzdy bildiremiz. Qazaqstan Ortalyq Azııada sıfrlyq tehnologııalar salasynda kósh bastaýǵa qajetti artyqshylyqqa ıe ekenine kúmánimiz joq. Sondyqtan jahandyq kompanııa retinde óńirde tehnologııalyq ınnovasııalardy engizip jatyrmyz», dedi Olga Skorohodova.
Aıta keteıik, «Silkway Accelerator» barysynda startaptyń eki qatysýshysyna turǵyn úı, halyqaralyq qatysýshylar úshin vızalyq qoldaý, sondaı-aq «Google for Startups» pen «Astana Hub»-tan oqytý men tálimgerlik qamtylǵan. Oqytý Astana qalasynda oflaın formatta ótedi. Tehnologııalyq jobalar 3 aı boıy Google-dyń úzdik sarapshylary ótkizetin sheberlik saǵattar men tálimgerlikke tegin qol jetkize alady. Qatysýshylar tıimdi bıznes-úderisterdi meńgeredi, masshtabtaýdy, seriktestik baılanystardy ornatýdy, sondaı-aq ınvestısııa tartýdy úırenedi.
Eske salsaq, Qazaqstan – Ortalyq Azııadaǵy «Google for Startups» jahandyq kompanııasymen birge akselerator júrgizetin birinshi jáne jalǵyz memleket. «Silkway Accelerator» birlesken baǵdarlamasynyń tıimdiligi men ónimdiligin eskere otyryp, Google for Startups Astana Hub-pen seriktestigin jalǵastyra beredi. «Google for Startups» – 2011 jyly Google korporasııasy iske qosqan startap baǵdarlamasy. Ol 125 eldegi 50-den astam kovorkıng pen akseleratordan turady jáne tehnologııalyq kásipkerler úshin praktıkalyq sabaqtar usynady.