Úkimet kóktemgi sý tasqyny saldaryn joıýǵa jáne zaqymdalǵan ınfraqurylymdyq nysandardy qalpyna keltirýge tótenshe rezervten qosymsha 22,7 mlrd teńge bóldi. Premer-mınıstr Oljas Bektenov tıisti qaýlyǵa qol qoıdy, dep jazady Egemen.kz.
Bólingen qarjy Aqmola, Aqtóbe, Qostanaı jáne Soltústik Qazaqstan oblystaryndaǵy joldardy, sondaı-aq kópirler men sý ótkizgish qurylymdardy qalpyna keltirýge, rekonstrýksııalaýǵa jáne qurylys jumystary úshin ákimdikterge úlestiriledi.
Sý tasqynynyń saldaryn joıý baǵytynda Aqtóbe oblysynda 31 joba júzege asyrylyp jatyr. Olardyń ishinde Yrǵyz – Nura, Yrǵyz – Quttykól, Qumtoǵaı avtojoldaryndaǵy sý ótkizgish qubyrlardy, Oıyl aýylyna aparatyn avtojoldy jóndeý, Oıyl ózenindegi kópirdi qaıta jańǵyrtý, sondaı-aq Áıteke bı aýdany Áıke aýylyndaǵy kópir ótkeliniń qurylysy bar.
«Aqmola oblysynda Atbasar qalasyna aparatyn jol bóligin, Atbasar – Sochınskoe avtojolyn qaıta jańartý, Jaltyr – Makınsk avtojolyn, Qalqutan aýylyna, Jambyl jáne basqa da eldi mekenderge kireberis joldaryn jóndeý jumystary júrgiziledi. Barlyǵy – 14 baǵyt.
Qostanaı oblysynda qarajat 22 baǵyt boıynsha joldardy, kópirlerdi jáne 10-ǵa jýyq sý ótkizgish qubyrdy jóndeýge jáne rekonstrýksııalaýǵa jumsalady», delingen Úkimet habarlamasynda.
Sonymen qatar osy qarjy esebinen Soltústik Qazaqstan oblysynda 10 joldy, onyń ishinde Kókshetaý – Omby baǵytyndaǵy joldy jóndeý, sondaı-aq 22 shaqyrym sý ótkizgish qubyrlarǵa ortasha jóndeý jumystaryn júrgizý josparlanǵan.