Á.Marǵulan ýnıversıteti Arheologııalyq zertteýler ınstıtýty Kóktas-2 arheologııalyq keshenine júrgizgen ekspedısııa barysynda sırek kezdesetin jádigerlerdi tapty. Sonyń biri – bizdiń zamanymyzǵa deıingi HIII-VIII ǵasyrlardyń ortasyndaǵy Sargarın-Alekseev mádenıetine jatatyn naızanyń ushy.
Maı aýdanyndaǵy Kóktas arheologııalyq kesheninde ekinshi jyl qatarynan zertteý jumystary júrgizilip jatyr. Bıyl munda 3,5 myń jyldyq tarıhy bar biregeı ǵımarattar, mys keni óndirilgen jáne óńdelgen kóne shahtalar tabyldy. Bul aımaqta 20-dan astam qorǵan bar, olardyń keıbireýi saq kezeńine jatady. Jerleý oryndaryn zertteý barysynda adam súıekteri, janýarlar, keramıkadan jasalǵan asúı ydystarynyń synyqtary, qoladan jasalǵan jebelerdiń ushtary tabyldy. Endi tabylǵan jádigerler qajetti zerthanalyq óńdeýden ótedi.
«Bul – Pavlodar óńiri úshin biregeı olja. Naızanyń ushy bizdiń zamanymyzǵa deıingi HIII-VIII ǵasyrlardyń ortasyndaǵy Sargarın-Alekseev mádenıetine jatady. Jalpy Á.Marǵulan ýnıversıtetine qarasty Arheologııalyq zertteýler ınstıtýtynyń ǵalymdary Ertis-Baıan óńiriniń tarıhı-mádenı murasyn saqtaý jáne zerdeleý boıynsha úlken jumys júrgizip otyr», deıdi arheologııalyq zertteýler ortalyǵynyń ǵylymı qyzmetkeri Asqar Ábildın.
Kóktas arheologııalyq kesheninde qazirgi ýaqytta ınstıtýttyń ǵylymı qyzmetkerleri Asqar Ábildın, Elena Týsheva, Talǵat Aılybaev bastaǵan arheologııalyq ekspedısııa jumys júrgizip jatyr. Arheologııalyq zertteýler ınstıtýtynyń ókili Eńlik Ábeýovanyń aıtýynsha, Maı aýdanyndaǵy tarıhı jerler negizinen keıingi qola jáne erte temir dáýirlerine jatady.
«Ǵalymdarymyzben birge ol jerlerde ýnıversıtetimizdiń 50-den asa stýdenti qazba jumystarymen shuǵyldanyp jatyr. Bir jaǵynan jastar úshin úlken tájirıbe bolady. Tabylǵan naızanyń ushy – eń jaqsy saqtalǵan jádigerdiń biri. Kezinde ǵulama ǵalym Álkeı Marǵulan Pavlodar oblysyndaǵy kóptegen jerge ǵylymı turǵydan sıpattama berip ketken. Sonyń ishinde Baıanaýyl aýdany aýmaǵynda qanshama arheologııalyq oryn bar. Toraıǵyrdaǵy saq qorǵandary, «Kempirtas» mańaıy bizdiń qyzmetkerlerimiz turaqty zertteý júrgizetin aýmaqtar. Shilde aıynyń sońynda Maı aýdanyndaǵy jumystarymyzdy támamdap, Baıanaýylǵa qaraı oıysamyz. Ekspedısııa músheleri ol jaqtan da oljaly qaıtady degen úmitimiz zor. Munda ashyq aspan astynda murajaı qurý jáne aınalymǵa jańa qyzyqty tarıhı-mádenı kórnekti oryn engizý kózdelip otyr. Pavlodar qalasy mańynda Baıdala qorymyn zertteý jalǵasýda, onda Qımaq kezeńine qatysty qyzyqty jerleý oryndary tabylǵan bolatyn», deıdi Eńlik Ábeýova.
Pavlodar oblysy,Maı aýdany