Eńbek jáne halyqty áleýmettik qorǵaý mınıstrligi jańa shart boıynsha qansha etnıkalyq qazaq kandas mártebesin alǵanyn málim etti, dep habarlaıdy Egemen.kz.
Qazaqstanda 2023 jyldyń shildesinen bastap «Halyqtyń kóshi-qony týraly» zańǵa sáıkes, bes negizgi shartty qamtıtyn kandas mártebesin berýdiń jańa tásilderi engizildi. Sol zań aıasynda 10 563 etnıkalyq qazaqqa kandas mártebesi berilgen.
Qandas mártebesi kelesi sharttarǵa sáıkes beriledi:
Qonys aýdarýshylar men qandastardy qabyldaýdyń óńirlik kvotalary sheńberinde Qazaqstan Úkimeti aıqyndaǵan óńirlerge qonystandyrý úshin (eńbek tapshylyǵy bar óńirler);Demografııalyq damýǵa qajettiligi bar damý áleýeti bar aglomerasııalar men aýyldyq eldi mekenderdiń, shaǵyn jáne monoqalalardyń, aýdandyq jáne oblystyq mańyzy bar qalalardyń aýmaqtarynda qonystandyrý úshin;
Turǵyn úı máselelerin óz betinshe sheshý múmkindigimen (nemese eger ótinish berýshi turǵyn úı ıesi bolyp tabylmasa, onyń turýyna týystarynyń notarıat kýálandyrǵan kelisimin berýmen) ótinish berýshiniń ótinish berý óńiriniń aýmaǵynda turaqty turatyn Qazaqstan azamattary bolyp tabylatyn otbasymen nemese jaqyn týystarymen (týystyǵyn rastaı otyryp) qaıta qosylýy úshin;
Jumys berýshilerdiń shaqyrýy boıynsha bos jumys ornyna jumysqa ornalasý úshin (aldyn ala eńbek shartyn qosa bere otyryp) ne turǵyn úı máselelerin óz betinshe sheshý múmkindigi bar etnıkalyq qazaqtar qataryndaǵy dara kásipkerler úshin;
Qazaqstannyń joǵary oqý oryndarynda oqıtyn etnıkalyq qazaqtar úshin (oqý ornynan anyqtamany qosa bergen kezde) beriledi.
Jańa tásil engizilgennen beri 3 296 etnıkalyq qazaq (1 374 otbasy) jumys kúshi tapshy aımaqtarǵa qonys aýdarý úshin kandas mártebesin alǵan. Aglomerasııa aýmaqtaryna jáne aýyldyq eldi mekenderge qonystandyrý úshin – 948 adam (475 otbasy) qonystanǵan. Otbasymen jáne/nemese jaqyn týystarymen qosylýy úshin – 5 655 adam (2 843 otbasy), jumys berýshilerdiń shaqyrýy boıynsha bos jumys ornyna jumysqa ornalasý úshin – 593 adam (295 otbasy) kelgen. Joǵary oqý oryndarynyń stýdentteri retinde – 71 adam (69 otbasy) qandas mártebesin alǵany belgili boldy.
Eske sala keteıik, etnıkalyq qazaqtardyń tarıhı otanyna oralýyn yntalandyrý jónindegi memlekettik saıasat elimiz táýelsizdik alǵannan beri júzege asyrylyp keledi. Sońǵy jyldary Qazaqstanǵa 1 mıllıon 137,1 myńnan astam adam oralyp, kandas mártebesin alǵan.