2024 jyldyń II toqsanynda ekinshi deńgeıli bankter men jekelegen banktik emes aıyrbastaý beketterinde jalpy salmaǵy 779,2 keli 14 752 altyn quıma satyldy. Halyqqa tazartylǵan altyn quımalardy satý jáne satyp alý baǵdarlamasyn Ulttyq bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 7 tonna 185 295 altyn quıma satyldy.
Altyn quımalar bes túrli salmaqta usynylady: 5, 10, 20, 50 jáne 100 gramm. Satyp alýshylar arasynda óte joǵary suranysqa ıe túri – 100 gramdyq altyn quıma. Jalpy, satylǵan quımalar arasynda onyń úlesi 25% – 46 007 dana. Odan keıin 10 gramdyq altyn quıma – 45 781 dana (25%), 5 gramdyq quıma – 41 592 dana (22%), 20 gramdyq quıma – 29 796 dana (16%), jáne 50 gramdyq quıma – 22 119 dana (12%).
«Altyn quımalar senimdi ınvestısııa quraly bola alady. Naryqtaǵy ótimdiliktiń basty kepili – bank pen banktik emes aıyrbastaý beketteri klıentke aqshany sol kúni tóleı otyryp, altyn quımalardy keri satyp ala alady. Baǵdarlama bastalǵannan beri ekinshi deńgeıli bankter men jekelegen banktik emes pýnktter jalpy salmaǵy 1 tonna 38 374 altyn quımany keri satyp alǵan. Bul – jalpy satylǵan altyn quımalardyń 21%-y», delingen Ulttyq bank habarlamasynda.
Árbir quıma qorǵaý elementterimen qaptalǵan (quımanyń aına beti, mıkrotekst jáne bederli jıegi bar) jáne mehanıkalyq zaqymdanýdan qorǵaıtyn arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sondaı-aq sapa sertıfıkaty bolyp sanalady. Sondyqtan altyn quımany uqypty saqtap, qorabyn búldirmeý kerek. Qazir altyn quımalardy «Halyk Bank», «Eýrazııalyq Bank», «Jusan Bank», «SentrKredıt Banki», sondaı-aq jekelegen banktik emes ortalyqtardan satyp alyp, keri satýǵa bolady.