Qaraǵandydaǵy ferroqorytpa zaýytynyń segiz jumysshysy kenetten peshten shyqqan jalynnyń saldarynan qatty kúıik alyp, aýrýhanaǵa jetkizilgen. Qaraǵandy oblysynyń densaýlyq saqtaý basqarmasy olardyń biri 22 shildede qaıtys boldy dep málimdedi, dep habarlaıdy Egemen.kz.
Dárigerler segiz naýqastyń altaýynyń jaǵdaıyn óte aýyr dep baǵalaǵan.
«Dárigerlerdiń barlyq kúsh-jigerine qaramastan, Qaraǵandy ferroqorytpa zaýytynyń zardap shekken qyzmetkerleriniń birin qutqarý múmkin bolmady. 1993 jyly týǵan azamattyń denesiniń 85 paıyzyn kúıik shalǵan. Osy ýaqyt ishinde naýqas óte aýyr jaǵdaıda boldy. Marqumnyń jaqyn týystaryna qaıǵyryp kóńil aıtamyz», delingen oblystyń densaýlyq saqtaý basqarmasynyń habarlamasynda.
Aıta keteıik, jergilikti dárigerlerge keńes berý jáne kómek kórsetý úshin Qaraǵandyǵa jetekshi sheteldik mamandar kelgen. Atap aıtqanda, kompanııa Reseıden kombýstolog mamandardyń kelýin jáne Izraıl men Túrkııa mamandarynyń onlaın-konsýltasııalaryn uıymdastyrǵan.
Eske salaıyq, 20 shildede № 1 zaýyt peshinde kenetten jalyn shyǵyp, saldarynan kásiporynnyń 8 qyzmetkeri zardap shekken bolatyn. Olar ártúrli aýyrlyqtaǵy dene jaraqattaryn alǵan.
Ferroqorytpa zaýytynda bolǵan oqıǵa boıynsha Qylmystyq kodekstiń 156-babynyń 2-bóligi «Abaısyzda densaýlyqqa aýyr zııan keltirýge ákep soqqan eńbek qaýipsizdigi erejelerin buzý» boıynsha sotqa deıingi tergeý bastalǵan.