«QazMunaıGaz» UK» AQ kompanııasyna monopolııaǵa qarsy zańnamany buzǵany úshin jarty mıllıard teńge aıyppul salyndy, dep habarlaıdy Egemen.kz Básekelestikti qorǵaý jáne damytý agenttigine silteme jasap.
Básekelestikti qorǵaý jáne damytý agenttiginiń Astana qalasy boıynsha departamenti prokýratýramen birlesip «QazMunaıGaz» AQ-nyń 2023 jylǵy kezeńde monopolııaǵa qarsy zańnamany saqtaýyna qatysty tekseris júrgizgen.
Nátıjesinde, kompanııanyń is-áreketterinde munaı ónimderin ótkizýdi shekteý bóliginde óziniń ústem jaǵdaıyn teris paıdalaný faktileri anyqtalǵan.
«Osylaısha, aksıonerlik qoǵam 2023 jyldyń qańtar-sáýir aılary aralyǵynda munaı ónimderin satýǵa berilgen ótinimderdi elemedi, al keıbir jaǵdaılarda munaı ónimderin ótkizý múmkindigi bar bolǵan jaǵdaıda jeke satyp alýshylarmen munaı ónimderiniń kólemin qysqartý jolymen kemsitýshilik jaǵdaılar jasady», delingen habarlamada.
Departament «QazMunaıGaz» AQ-ǵa qatysty QR ÁQBtK-niń 159-babynyń 3–1-bóligimen ákimshilik is qozǵaǵan. Astana qalasynyń Ákimshilik quqyq buzýshylyq ister jónindegi mamandandyrylǵan aýdanaralyq sotynyń 27 maýsymdaǵy qaýlysymen seriktestik 539,4 mln teńge kóleminde aıyppul tóleýge tartylǵan.
Búginde atalǵan soma tolyq kólemde tólengen.