Almaty qalasynda memleket jáne qoǵam qaıratkeri Dinmuhamed Qonaevqa arnalǵan mural salyndy, dep jazady Egemen.kz.
Qalanyń Alataý aýdanyndaǵy Baýyrjan Momyshuly men Móńke bı kósheleri qıylysyndaǵy 15-úıdiń qabyrǵasyna muraldyń salynýyna «Dinmuhamed Qonaev» atyndaǵy halyqaralyq qordyń beldi múshesi Qaldarbek Smaıyluly muryndyq bolyp, qabyrǵa sýretine jumsalǵan qarajatty da óz qaltasynan shyǵarǵan.
Ol mural salýdy biraz jyl buryn josparlaǵanymen demeýshiler tabylmaı, qomaqty qarajat jınalmaǵandyqtan júzege asýy ońaıǵa soqpaǵan. Meıirjan Otynshıev esimdi azamat úı keregesin órnekteýge jergilikti ákimdikten ruqsat alyp berýge kómektesse, Q. Smaıyluly onyń eskızin, qalaı salynatynyn otbasymen birge aqyldasyp sheshken.
Aıta keteıik, segiz balanyń ákesi Qaldarbek Smaıyluly atalǵan ıgi iske deıin zańǵar tulǵanyń beıitin tazalap, qorshaýyn syrlap, ony bútindegeni, kitabyn qaıta basqyzǵany, D.Qonaevqa arnalǵan alaman báıgege óziniń avtokóligin tikkeni, óz qarajatyna erkin kúresten týrnır ótkizgeni áli kúnge el esinde.
Dinmuhamed Ahmetuly el basqarǵan jyldary keń baıtaq dalamyzda kóptegen óndiris oryndarynyń esigi ashylyp, iri qurylys ǵımarattary salynǵany málim. Muralda sol kezde boı kótergen 43 qalanyń árbiri jeke ataýmen aıshyqtalǵan eken jáne elin súıgen birtýar tulǵanyń naqyl sózi jazylypty.
Sýretti óz isiniń sheberi Jánibek Jumaǵalıev beınelegen. Eni – 15 metr, bıiktigi – 12 metrlik mural 5 kún ishinde salynǵan eken.