Eriktilik shekaramen shektelmeıdi. «Jastar rýhy» belsendileri men «Biz Birgemiz» qory Qyrǵyzstandaǵy alapat selden zardap shekken turǵyndarǵa gýmanıtarlyq kómek jiberdi. 40 tonnalyq júk Almatydan Osh qalasyna jedel jetkizildi.
Qyrǵyz Respýblıkasynyń Osh oblysyndaǵy sel saldarynan turǵyn úıler men áleýmettik nysandardy qosa alǵanda 800-ge jýyq ǵımaratty sý basty. 14 shildedegi tolassyz jaýyn-shashynnan alty adam qaza tapty. Jergilikti jaýapty ókilderdiń málimetinshe, tabıǵı apat qaıtalanyp, bir aýrýhana, saýda úıi, bes kópir zaqymdanyp, 23 avtokólikti sý aǵyzyp ketken. Osynaý qıyn tusta otandastarymyz tasada qalmady. «Biz Birgemiz» qory men «Jastar rýhy» Jastar qanatynyń eriktileri evakýasııalanǵan turǵyndary úshin azyq-túlik, kıim-keshek jáne qajetti zattardy jınap, kómek kórsetýge kirisip ketti.
– Elimizde oryn alǵan tótenshe jaǵdaılar kezinde qyrǵyzstandyqtar qoldaý kórsetip, janymyzdan tabyla bildi. Qıyn halde qalǵan Osh oblysynyń turǵyndaryna da tıisti demeý bildirý – bizdiń paryzymyz dep bilemin. Daıyndalǵan zattar ishinde uzaqqa jaramdy azyq-túlikter, tósek oryndary – matras, jastyq, jamylǵysh jáne taǵy basqa alǵashqy ýaqytta qajet dúnıeler bar, – dedi «Biz Birgemiz» qorynyń jetekshisi Perızat Qaırat.
О́z kezeginde gýmanıtarlyq júkterdi tıeýge jáne jóneltýge kómek kórsetý úshin az ýaqyt ishinde «Jastar rýhy» Almaty qalalyq fılıalynyń 20-dan astam eriktisi jumyldyrylǵan.
– Bizdiń eriktiler kez kelgen jaǵdaıda kómek kórsetýge árqashan daıyn. Baýyrlas qyrǵyz eline qoldan kelgen kómekti aıamaıtyn bolamyz. Tótenshe jaǵdaılar kezinde tájirıbe jınaqtaǵan jastarmen Osh qalasyna jol tarttyq, – dedi «Jastar rýhy» Almaty qalalyq fılıalynyń tóraǵasy Ákejan Keńesov.