Elordadaǵy «Aımaqtaý» saýda úıiniń mańynda mektep jármeńkesi bastaldy, dep habarlaıdy Egemen.kz qala ákimdiginiń resmı saıtyna silteme jasap.
«Mektepke jol» aksııasy aıasynda ótetin dástúrli jármeńkede keńse taýarlary men mektep formasyn qolaıly baǵamen satyp alýǵa bolady.«1 tamyzdan 31 tamyzǵa deıingi aralyqta ótetin «Mektepke jol» respýblıkalyq jármeńkesi bastaldy. О́tken jylǵy is-shara aıasynda 8 myńnan asa bala mektepke daıyndyq jasaǵan bolsa, bıyl 8,5 myń balany qamtý josparlanyp otyr.
«Mektepke jol» aksııasy, negizinen, demeýshilerdiń jáne mesenattardyń qarajaty esebinen júzege asyrylady. Budan bólek, bizdiń jalpyǵa birdeı mindetti bilimmen qamtý baǵdarlamasy aıasynda jumystar júrgizilip jatyr. Sonyń nátıjesinde ótken jyly halyqtyń áleýmettik osal toptaryna jatatyn 14 040 balaǵa atalǵan baǵdarlama aıasynda kómek kórsetilse, bıyl 14 500 balany qamtýdy josparlap otyrmyz. Halyqtyń áleýmettik osal toptary sanattaryna áleýmettik kómek alatyn otbasy balalary, otbasynyń jan basyna shaqqandaǵy tabysy eń tómengi kún kóris deńgeıinen tómen, ata-anasynyń qamqorlyǵynsyz qalǵan balalar, tótenshe jaǵdaılarǵa tap bolǵan balalar jáne basqalary jatady. Eger otbasy atalǵan sanattarǵa jatatyn bolsa, onda balalardyń ata-analary mektepke baryp, rastaıtyn qujattardy usynýy kerek. Qazirgi ýaqytta mektepterdiń áleýmettik pedagogteri bilim alýshylardyń jańa jıyntyǵyn eskere otyryp, muqtaj balalardyń tizimin qalyptastyrýda. 2024-2025 oqý jylynda materıaldyq kómektiń mólsheri bir balaǵa 43 407 teńgeni qurady» , dedi Astana qalasy Bilim basqarmasynyń bas mamany Quttymurat Shamshıev.
«Aımaqtaý» saýda mańynda ornalasqan mektep jármeńkesi kúndelikti tańerteńgi saǵat 09.00-den keshki saǵat 20.00 aralyǵynda 5 qyrkúıekke deıin jumys isteıdi.
Aıta keteıik, mundaı mektep jármeńkeleri qaladaǵy basqa da iri saýda úılerinde uıymdastyrylmaq.