Atyraý oblysynda aptap ystyqtyń beti qaıtar emes. Bul kanaldardaǵy balyqtyń jappaı qyrylý qaýpin týǵyzyp tur.
Osyǵan baılanysty Jaıyq-Kaspıı oblysaralyq basseındik balyq sharýashylyǵy ınspeksııasynyń qyzmetkerleri men jergilikti turǵyndar balyq shabaǵyn qutqarýdy jalǵastyryp jatyr. Inspeksııa qyzmetkerleriniń aıtýynsha, Atyraý qalasynan Reseıdiń Astrahan óńirimen shekaraǵa deıin qatynaıtyn tasjol boıyndaǵy kanal jaǵalaýynan qarabalyq tuqymdas balyqtyń 2-3 danadan óleksesi baıqalǵan.
«Joldaǵy avtokólik kópiriniń oń jaǵynda 1 shaqyrymdaı qashyqtyqtaǵy Saryózek kanaly jaǵalaýynda tiri balyq shabaqtary óte kóp. Al Qyzyljar eldi mekeni tusynda kanal boıy jarylyp, kóp mólsherdegi sý dalaǵa jaıylyp jatyr. Aýa temperatýrasynyń ysýyna baılanysty sýdy toqtatý kerek», dep habarlady oblysaralyq ınspeksııa.
Al 21 shildede áleýmettik jelide Mahambet aýdanyndaǵy Beıbarys aýyly mańyndaǵy Saryózek kanalynda balyq qyrylǵany týraly aqparat tarady. Bul jóninde memlekettik jáne jergilikti atqarýshy organdarǵa, sondaı-aq ǵylymı mekemelerge jedel habar berilgen.
Jaıyq-Kaspıı oblysaralyq basseındik balyq sharýashylyǵy ınspeksııasynyń basshylyǵy men ekologııa departamentiniń ókilderi, Beıbarys aýyldyq okrýgi, sondaı-aq ǵylymı uıym men «Qazsýshar» RMK ókilderinen quralǵan komıssııa balyq qyrylǵan jerge bardy. Shabaqtardyń qyrylǵany týraly aqparat rastalyp otyr. О́lgen shabaqtardyń jalpy salmaǵy – shamamen 80 kg. Jergilikti atqarýshy organdar sanıtarlyq normalarǵa sáıkes ólgen shabaqtardy joıdy. Shabaqtardyń qyrylýyna Saryózek kanalyndaǵy sýdyń taıyzdanǵany sebep bolǵan. Qazir sýdyń tereńdigi – 40-50 sm. Atyraý oblysy ekologııa departamenti zerthanalyq zertteý júrgizý úshin sý synamasyn aldy.
Inspeksııaǵa qarasty Atyraý balyq ınspeksııasy bóliminiń mamandary arnaıy apparattarmen sýdaǵy ottegi mólsherine, sýdyń temperatýrasyna taldaý júrgizdi. Sýdaǵy otteginiń úlesi – 3,1-3,8 mg/dm³, sýdyń temperatýrasy – 29°C, tereńdigi – 60-70 sm.
Jaıyq-Kaspıı oblysaralyq basseındik balyq sharýashylyǵy ınspeksııasynyń basshysy Nurlybek Ǵaısınniń aıtýynsha, Mahambet aýdanynyń Beıbarys aýylynyń aýmaǵyndaǵy Saryózek kanalynan 520 myńnan asa balyq shabaǵy qutqarylǵan.
«Kóktemgi sý tasqyny saldarynan Jaıyq ózeni arnasynan asyp, Saryózek kanalyna quıylǵan. Tasqyn sýmen birge kanalǵa balyq shabaqtary túsken. Maýsym aıynda Jaıyq ózenindegi sý deńgeıi turaqtandy. Al kanalda tasqyn sý, balyq shabaqtary jınalyp qalǵan», deıdi Nurlybek Ǵaısın.
Onyń aıtýyna qaraǵanda, kanalda jınalǵan balyq shabaqtaryn tirideı saqtap qalý úshin nasos arqyly sý jiberilip jatyr. Balyq shabaqtaryn qutqarý jumystary jalǵasa beredi.
«Qutqarylǵan balyq shabaqtarynyń túri – áralýan. Máselen, sazan, taban, kókserke, jaıyn, móńke shabaqtarynyń ortasha salmaǵy – 12-14 gramm. Bıylǵy maýsym aıynan beri Atyraý oblysynyń sý aıdyndarynan 49 mln 920 myńnan asa balyq shabaqtary qutqaryldy. Onyń ishinde Qurmanǵazy aýdanynyń aýmaǵynan – 39 mln 900 myń, Inder aýdanyndaǵy sý aıdyndarynan – 8 mln 500 myń, Mahambet aýdanynan – 1 mln 520 myń, Atyraý qalasynda 35,5 myń dana balyq shabaǵy qutqarylyp, Jaıyq ózenine jiberildi», dep málimdedi N.Ǵaısın.
Atyraý oblysy