Astana qalasynda ótetin V Dúnıejúzilik kóshpeliler oıyndaryna ázirlik barysymen sheteldik blogerler tanysty. Dúnıejúzilik kóshpeliler oıyndaryn daıyndaý jáne ótkizý dıreksııasy «Qazaqstan» jeńil atletıka kesheninde sheteldik blogerlerge otandyq týrızmdi damytýdyń josparyn, órkendeý úderisi men ulttyq sport túrleriniń órisin tanystyrdy.
Taıland, Malaızııa, Qytaı, Oman, Túrkııa, Ázerbaıjan, Vetnam, Italııa jáne Qyrǵyzstannan kelgen blogerler ulttyq oıyndardyń elimizde qarqyn alyp kele jatqanyna kóz jetkizdi. Kelgen qonaqtardyń arasynda áleýmettik jelide oqyrmandary 1 mıllıonnan asatyn blogerler de bar. Is-shara aıasynda qonaqtar qazaq kúresi, qusbegilik, asyq atý, toǵyzqumalaq, mangala, ovarı, mas-restlıng jáne dástúrli sadaq atý sport túrlerimen tanysty. Elimizdiń týrıstik áleýetin kúsheıtip ári Dúnıejúzilik kóshpeliler oıyndaryn mıllıondaǵan sheteldik bloger ortasynda nasıhattaýǵa múmkindik beretin is-shara barysynda meımandar kóp jaıtqa qanyqty.
8-13 qyrkúıek aralyǵynda ótetin Dúnıejúzilik kóshpeliler oıyndaryna 89 elden 2 myńnan asa sportshy qatysady dep josparlanyp otyr. Etnosport dodasyna qatysýshylar sporttyń 21 túrinen 97 medal jıyntyǵy úshin tartysqa túsedi.