«Maıqaıyń-altyn» AQ-na qarasty altyn shahtasyndaǵy apattan kóz jumǵan tórt azamattyń barlyǵy jer qoınyna tapsyryldy. Qutqarýshylar sońǵy ekeýiniń múrdesin oıyqqa qulaǵan topyraq arasynan jarty jyldan asa ýaqyt izdedi. Aqyry shilde aıynyń ekinshi jartysynda taýyp, týystaryna amanattady.
Endigi másele kenishtiń qaıta iske qosylýyna qatysty bolyp otyr. Sebebi ken baıytý kombınaty keıingi jarty jylda qaldyq kenmen jumys istep, áleýeti tómendep qalǵan. Al kásiporynda myńǵa jýyq qyzmetker nápaqa taýyp otyr.
Buǵan deıin jazǵanymyzdaı, kenishtegi apat pen onyń mańyndaǵy úılerdiń máselesin prokýratýra qurǵan tergeý toby zerdelep jatqanyna baılanysty shahtadaǵy ken qazý jumystary 4 qańtardan beri qańtarylyp qalǵan edi. Sol ýaqytta 185 jumysshy jalaqysynyń 50 paıyzy saqtalýymen májbúrli demalysqa jiberilgen. Keıin olardyń biraz bóligi kásiporynnyń ózge qurylymdyq bólimshelerinen jumys tapsa, keıbiri ózge kásiporyndarǵa aýysyp ketti.
Al 25 shilde kúni qutqarýshylar shahta mańyndaǵy oıyqqa túsip qaza bolǵan sońǵy qutqarýshynyń denesin alyp shyqty. Ol – 56 jastaǵy Aıyp Tileýbergenov. Marqum kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynda jedel avtokólik júrgizýshisi bolyp eńbek etken. Ol eńbek jolyn alǵashqyda quqyq qorǵaý salasynda tártip saqshysy bolyp bastaǵan. Keıin densaýlyǵyna baılanysty bul salamen qosh aıtysýǵa týra kelipti. Odan soń ár jyldary «Maıqaıyńaltyn» AQ-da, Maıkóbedegi kómir kenishinde, keıingi 6-7 jylda kásibı áskerılendirilgen avarııalyq-qutqarý qyzmetteriniń respýblıkalyq ortalyq shtaby Pavlodar fılıalynda eńbek etken.
Osylaısha, avtobýspen qurdymǵa qulap qaza tapqan tórt qutqarýshynyń da múrdesi tabyldy. Endigi rette «Maıqaıyń-altyn» AQ-nyń qyzmetkerleri shahtanyń tezirek ashylýyn kútip otyr. Sebebi keıingi jarty jyl boıy kásiporynnyń ken baıytý kombınaty qaldyq kenmen jumys istep kelgen.
Apat bolǵan altyn kenishi óz jumysyn qashan jalǵastyrady? Bul saýaldy Tótenshe jaǵdaılar mınıstrligi О́nerkásiptik qaýipsizdik komıtetiniń Pavlodar oblysy boıynsha departamentiniń basshysy Almaz Oljaǵulovqa qoıdyq.
– «Maıqaıyń-altyn» AQ-na qarasty altyn kenishi mańyndaǵy apat saldarynan ishinde tórt qutqarýshy bar avtobýs topyraq arasyna qulap ketkeni málim. Mine, arada jeti aıǵa jýyq ýaqyt ótkende sońǵy qutqarýshy qazyp alyndy. Marqum qutqarýshylardyń týystarynyń kóńili ornyna tústi dep oılaımyz. Al altyn shahtasynyń qaıtadan iske qosylýy týraly másele jaqyn kúnderi belgili bolyp qalady. Bul úshin eń áýeli ken óndirýshi kásiporyn bizdiń departamentke taý-ken jumystarynyń josparyn usynýy kerek. Ony respýblıkalyq komıtetimiz quptaǵan jaǵdaıda shahta óz jumysyn jalǵastyra alady. Buǵan deıin arnaıy komıssııa jer astyndaǵy shahtanyń jaı-kúıin zerdelep, 33 tarmaqtan turatyn kemshilikti joıý týraly uıǵarymdy aksıonerlik qoǵam basshylyǵyna jóneltken. Bul olqylyqtardyń orny toltyrylyp, kenish óz jumysyn bastaýǵa daıyndalyp jatqany anyq, – dep jaýap berdi A.Oljaǵulov.
Buǵan deıin Astana soty altyn kenishindegi qaıǵyly oqıǵa tolyqtaı «Maıqaıyń-altyn» AQ-nyń kinásinen bolǵan degen sheshim shyǵarǵan edi. Al Eńbek jáne áleýmettik qorǵaý komıtetiniń tóraǵasy Tólegen Ospanqulov Maıqaıyńdaǵy apat boıynsha 21 adam kináli dep tanylýy múmkin ekenin aıtqan.
Aıtyp óteıik, qurdymǵa qulaǵan avtobýsta Aıyp Tileýbergenovten bólek, Berdihan Sarqyt, Oleg Tyshkovıch, Aıdos Shaımerden bolǵan edi.
Pavlodar oblysy,
Baıanaýyl aýdany,
Maıqaıyń kenti