Atyraý oblysynda munaıshylar men temirjolshylardyń, dárigerler men pedagogterdiń dınastııasy kóp. Solardyń qatarynda Qabdol Myrzaǵalıevten taraǵan áýlet te bar.
Taspadaı túzý tartylǵan shoıynjol boıynda shyńdalǵan áýlettiń eńbek shejiresin Qabdol qarııa bastaǵan. Ol 1898 jyly Qyzylqoǵa aýdanyndaǵy Sarykól aýylynda ómirge kelipti. 1936 jyly Maqat aýdanyna qonys aýdarǵan. О́ıtkeni osy kezeńde Gýrev – Qandyaǵash baǵytyna temirjol tartyla bastaǵan edi. Alysqa uzap shyqpaıtyn aýyl turǵyndary úshin tosyn kórinis bolǵanymen, Qabdol temirjol qurylysyna qatysýǵa belin bekem býady. Sóıtip, bastaýynda ózi turǵan urpaq sabaqtastyǵyna qosa áýletiniń osy saladaǵy eńbek shejiresin jańa arnaǵa burdy.
Ol ejelden qońsy otyrǵan qos óńirdiń arasyn jalǵaǵan temirjoldyń tabanyna aýyr relsti tóseýmen bilek kúshin qataıta júrip, osy salanyń beldi ókiline aınaldy. Temirjol boıynda ashylǵan Bekbıke, №21 beketterde kezekshiniń jumysyn atqaryp, aýyr júk tasyǵan quramalar men jolaýshylar poıyzynyń ýaqytynan keshikpeı júrýine atsalysty. Osylaısha, áýlet úshin tyń salaǵa aınalǵan temirjolǵa ǵumyrynyń 22 jylyn arnady.
О́zinen taraǵan balalarynyń da osy salada jumys istegenin qalaǵan Qabdol qarııanyń armany oryndaldy. Aldymen uly Jeksenbaı izin jalǵady. Onyń bul saladaǵy eńbek ótili 35 jylǵa sozylypty. Osynsha jyl jol jóndeýshi bolyp jumys istedi. Jazdyń aptaby men qystyń qaqaǵan sýyǵynda shoıynjoldy jaǵalap, kem-ketigin túzeıtin jóndeýshilerdiń jumysy ońaı emes. Jol jóndeýshilerge júkteletin jaýapkershiliktiń júgi de aýyr. О́ıtkeni jolaýshylardy, munaı-gaz ónerkásibine, qurylys ındýstrııasyna qajetti aýyr júkterdi tasymaldaıtyn poıyzdardyń bir stansadan ekinshisine mezgilinde jetýi aldymen jol jóndeýshilerdiń qyraǵylyǵyna baılanysty bolady.
Jumysy aýyr bolsa da qabaǵyn shytpaǵan, mańdaı termen tabys tabýdan erinbegen Jeksenbaıdy áriptesteri úlgi tutty. Onyń áıeli Aqdesh de osy salada shyńdaldy. Alqyzyl jelet kıgen jigittermen birge biraz jyl elektr monteri retinde tájirıbe jınady. Aǵasynyń eńbekqorlyǵynan úlgi alǵan inisi Sısenbaı da 47 jyl boıy temirjol salasynda eńbek etti. Iskerlik pen uıymdastyrýshylyq qabileti astasqan oǵan jol jóndeýshiler sheberi mindeti júkteldi.
Berekeli isti Qabdol qarııanyń nemereleri men shóbereleri de jalǵastyrdy. Urpaqtar sabaqtastyǵy úzilgen joq. Atasy eńbek etken temirjol salasyna Tuıaqbaı, Ulmeken, О́tegen, Jalǵasbaı, Járdem, Baýyrjan, Janbıke, Baǵytjan, Muhanbetjan, Nurmuhanbetjan esimdi nemereleri jumysqa ornalasyp, osy salanyń beldi mamany atandy. Endi bul kásipti shóbereleri Erlan, Jumabek, Qojabek, Sáýirbaı, Medet, Saǵynjan jalǵastyryp keledi. Tipti jıenderi Qalybek pen Aqylbek naǵashylarynyń tájirıbesinen úırenip, temirjolshy atanyp otyr.
«Áýletimizdiń eńbek joly, ómir súrý daǵdysy temirjolmen sabaqtasyp jatyr. Qabdol atamyz bastaǵan isti ákelerimiz, aǵalarymyz jalǵastyryp, temirjolshy boldy. Olar qıyn kezeńde jumys istedi. Biraq jumystyń aýyrlyǵyna moıyǵanyn kórmedik. Adal eńbek etip, el damýyna úles qosty. Balalarynyń qatarynan qalmaı, bilim alǵanyn qalady. Sol úrdis jalǵasyn tapty. Atamyzdyń nemereleri de, shóbereleri de temirjol salasynda eńbek etip júr. Temirjolshy – bizdiń otbasylyq kásimizge aınalǵan mamandyq. Qazir aǵaıyndy, ákeli-balaly Myrzaǵalıevter temirjol salasynda jumys istep, el ekonomıkasynyń órkendeýine úles qosyp júr. О́zim uzaq jyl teplovoz mashınısi bolǵan edim», deıdi Qabdol qarttyń nemeresiniń biri О́tegen Myrzaǵalıev.
Qazir temirjolshy mamandyǵy Maqat aýdanyndaǵy Myrzaǵalıevter áýletiniń úshinshi býynyna jalǵasty. Áýlettiń jalpy eńbek ótili 500 jyldan asady.
Atyraý oblysy