Kólik qyzmetkerleri kúni – kez kelgen kólik quralyn urshyqsha ıirip, tehnıkalyq qyzmet kórsetetin avtomehanık sekildi mamandyq ıeleriniń de mereıli merekesi. Qaraǵandydaǵy №3 avtoparkte slesar bolyp eńbek etetin Táttimbet Janat segiz qyrly, bir syrly azamat. О́zi ánshi, ózi sazger jigittiń óner jolynda júrip te bala-shaǵasyn asyraı alatyn qabileti bar. Biraq óziniń ekinshi úıindeı bolyp ketken avtoparktegi qyzmetine ámanda adal.
Táttimbet qara eńbekpen ósken, mańdaı terdiń qadirin biletin azamat. Avtoparkke jumysqa ornalasqansha birneshe jerde eńbek etti. Jeti qat jer astyna da tústi. Kostenko atyndaǵy shahtada da biraz jyl ter tókti. Keıin óziniń qolynan keletin qazirgi slesarlyq qyzmetke aýysty. Osy jerde júrip ósip-óngen Táttimbetke birneshe usynys tússe de, avtoparkten ketkisi joq. О́ıtkeni juldyzymdy jaqqan da, baǵymdy tapqan da osy bir jumys orny deıdi.
Munda kúnine tórt-bes avtobýsty tehnıkalyq tekseristen ótkizedi. Maı-sýyn aýystyrady. Fıltrlerin jańalaıdy. Buzylyp turǵan bólshekterin aıyrbastaıdy. Qala ishindegi kók avtobýstar esh kedergisiz júrip tursa, onda Táttimbet sekildi jumysyna jaýapty mehanıkterdiń eńbegi dep bilińiz.
«Tańnan keshke deıin toqtaýsyz jolda júretin avtobýstarda tehnıkalyq kinárat bolmaýy kerek. О́ıtkeni olar jolaýshy tasymaldaıdy. Sonda bizdiń de jaýapkershilik júgimiz aýyr degen sóz. Degenmen qazir burynǵydaı emes, avtobýstar birshama jańalanyp qaldy», deıdi slesar Táttimbet.
Bes jasynan bastap qoı kezekte dombyra shertip júrgen qara domalaq bala ónerin osynda júrip shyndap qolǵa alady. «Meńdi qyz» ánine avtoparktegi kólik jóndeıtin áriptesterimen birge beınebaıan túsirip, kópshilikke tanymal bolyp shyǵa keldi.
«Jumys ýaqytynda tek jumysty ǵana oılaımyn. Kólikterdiń kináratsyz júrýi – biz úshin basty mindet. Saladaǵy biliktiligimdi jetildirip, maman retinde damýdy kózdeımin. Kólik salasynda qyzmet etip júrgen barsha áriptesterimdi kásibı merekemen quttyqtaımyn. Ilegenimiz bir teriniń pushpaǵy, otandyq kólik salasy qanatyn keńge jaıa bersin», deıdi aqjarqyn azamat.
Qaraǵandy oblysy