Prezıdent «Samuryq-Qazyna» aksıonerlik qoǵamynyń basqarma tóraǵasy Nurlan Jaqypovty qabyldady, dep habarlaıdy Egemen.kz Aqordanyń baspasóz qyzmetine silteme jasap.
Prezıdentke Qordyń bıylǵy birinshi jartyjyldyqtaǵy qyzmetiniń negizgi qorytyndylary jáne aldaǵy jumystarynyń jospary tanystyryldy.
Nurlan Jaqypovtyń aıtýynsha, basty óndiristik kórsetkishter josparǵa sáıkes atqarylyp otyr. Qordyń kirisi 7,9 trıllıon teńgeni qurady. Bul belgilengen jospardan 7 paıyzǵa artyq.
Qor tikeleı sheteldik ınvestısııanyń katalızatoryna aınaldy. Sonymen qatar munaı-gaz hımııasy, energetıka, kólik jáne logıstıka, mashına jasaý, sıfrlandyrý salalaryndaǵy jobalarǵa sheteldik seriktesterimen birlesip ınvestısııa quıady.
Memleket basshysyna «Samuryq-Qazyna» tobynyń ınvestısııalyq portfelinde jalpy somasy 53,5 trıllıon teńge bolatyn 130-dan astam joba bar ekeni baıandaldy. Munaı-gaz, munaı hımııasy, energetıka, logıstıka salalarynda jáne taý-ken ónerkásibinde júzege asyrylatyn jobalar el ekonomıkasyna mýltıplıkatıvti áser etedi dep kútilýde.
Budan bólek, Qasym-Jomart Toqaevqa Qordyń bıznestiń áleýmettik jaýapkershiligi aıasyndaǵy qaıyrymdylyq jobalary týraly málimet berildi. Jyl sońyna deıin elimizde 40 ońaltý ortalyǵyn ashý josparlanyp otyr.
Kezdesý sońynda Memleket basshysy ınvestısııalyq jáne áleýmettik jobalardy júzege asyrý, sondaı-aq Qor jumysyn odan ári jetildirý jóninde naqty tapsyrma berdi.