Kóktemde sý tasqynynan zardap shekken Batys Qazaqstan oblysynda osy kúnderi kún saıyn qýanysh. Baspanasy sýǵa ketken turǵyndar jańa úı men páterge ıe bolyp jatyr.
Memleket basshysy elimizde sý tasqynynan zardap shekken turǵyndarǵa tıisti kómek kórsetiletinin málimdegen edi. Mine, Batys Qazaqstan oblysynda da sý tasqyny saldarynan baspanasy jaramsyz dep tanylǵan jandarǵa myńdaǵan páter satyp alynyp, 775 turǵyn úı jańadan salyndy.
О́tken aptanyń sońǵy kúnderi Bórli aýdanynda sý tasqynan zardap shekken azamattar baspanamen tolyq qamtamasyz etildi. Turǵyndardyń qýanyshyna óńir basshysy Narıman Tóreǵalıev ortaqtasty. Aıta keteıik, bıylǵy tabıǵı apat kezinde Bórli aýdanynda barlyǵy 126 úı jaramsyz dep tanylǵan edi. Sóıtip, turǵyndardyń óz qalaýymen 66 otbasyna páter satyp alyp berilse, qalǵan 60 otbasy úshin jańa turǵyn kóterildi. Nátıjesinde, Aqsý aýlynda – 23, Keńtúbek aýlynda – 11, Pýgachev aýlynda – 12, Araltal aýlynda 14 turǵyn úı jańadan salyndy. Qurylys jumysy bıylǵy 22 mamyrda bastalyp, josparǵa sáıkes 1 tamyzǵa deıin aıaqtaldy.
– Memleket basshysy Qasym-Jomart Toqaevtyń tapsyrmasyna sáıkes sý tasqynynan zardap shekken turǵyndarǵa zań aıasynda tıisti kómek kórsettik. Búginde turǵyndarǵa 100 AEK kóleminde birjolǵy áleýmettik kómek jáne búlingen dúnıe-múlik úshin 150 AEK kóleminde tólem tolyǵymen óteldi. Sonymen qatar sý tasqyny kezinde búlingen úılerdiń 90 paıyzynan astamyna turǵyn úıin jóndeýge jáne qalpyna keltirýge ótemaqy berildi. Keshe ǵana úıinen aıyrylyp, qaıǵyda qalǵan turǵyndar búgin jańa baspanaǵa ıe bolyp jatyr. Qazirgi tańda oblysymyzda myńnan asa baspana satyp alynyp, sý tasqynynan zardap shekken otbasylarǵa berildi. Sonymen qatar 775 turǵyn úıdiń qurylysy qarqyndy júrgizildi. Biz búgin osyndaı 60 úıdiń halyq ıgiligine berilý sátine kýá bolyp otyrmyz, – dedi N.Tóreǵalıev.
Bórli aýdanyndaǵy qurylys jumystaryna «Aqsaıgazservıs» AQ, «Aqjaıyq», «Demeý» qorlary jáne «Qazaq Stroy Almaty» JShS demeýshilik etken. Qarjylandyrýdyń jalpy kólemi 1,6 mlrd teńgeni qurapty.
– Biz Pýgachev aýlyna 2006 jyly otbasymyzben kóship kelip, úı salyp alǵan edik. Sol úıimizdi naýryz aıynyń aıaǵynda tasqyn sý basty. Degenmen arada kóp ýaqyt ótpeı jańa baspanaly bolyp jatyrmyz. Jaryq, keń, 3 bólmeli, barlyq jaǵdaıy jasalǵan baspanaǵa qol jetkizgenimizge óte qýanyshtymyz. Osyndaı qamqorlyǵy úshin Memleket basshysyna alǵysymdy bildiremin, – deıdi búgin qonystoı toılaýshylardyń biri Aqkenje Imanalıeva.
Dál osyndaı qýanysh Syrym, Báıterek aýdandarynda da boldy. Syrym aýdanynda 14 úı, Báıterek aýdanynda 6 páter josparly merzim ishinde salynyp, sý tasqynynan zardap shekken turǵyndarǵa berildi.
– Biz sý tasqynynan zardap shekkenderge zań aıasynda jan-jaqty qoldaý kórsetip, birjolǵy áleýmettik kómek, dúnıe-múlik shyǵyny úshin tólem jáne búlingen baspana shyǵyndaryn tolyǵymen ótep otyrmyz. Kóktemde sý apatyna tap bolyp, qıyndyq kórgen halyq búginde jańa baspanaǵa ıe bolyp jatyr. Tamyzdyń alǵashqy eki kúninde 80 úıdiń qurylysy aıaqtalyp, turǵyndarǵa tabystaldy, – deıdi oblys ákiminiń orynbasary Tilepbergen Kaıýpov.
Báıterek aýdanyndaǵy jańa páterler «Nostrum Oil and Gas» kompanııasy men «Qazaqstan halqyna» qoǵamdyq qorynyń demeýshiligimen salynǵan eken.
– Memlekettiń qoldaýymen barlyq qıyndyq artta qaldy. Prezıdentimiz Qasym-Jomart Kemelulyna alǵysymyzdy bildiremiz. Dalada qalmadyq. Tórt aı ishinde sý jańa baspanaǵa qol jetkizip otyrmyz, – deıdi turǵyn Jumajan Jurymbaev.
Batys Qazaqstan oblysy