Mańǵystaý oblysynyń turǵyny 56 jastaǵy Úsenǵalı Moldaǵalıev Astanada ótken kıokýshınkaı-karateden alǵashqy Azııa birinshiliginde baq synap, chempıon atandy.
75 kılo salmaqta óner kórsetken sportshy jekpe-jektiń bul túrimen 32 jyldan beri aınalysyp keledi. Birinshi jarys kúniniń qorytyndysy boıynsha óz jasy men salmaǵyna baılanysty óner kórsetken 15 otandasymyz chempıon boldy. Taǵy 36 sportshy kúmis pen qola aldy. Eske sala keteıik, Jaqsylyq Úshkempirov atyndaǵy jekpe-jek saraıynda kıokýshınkaı-karateden balalar men jasóspirimder arasyndaǵy 4-álem chempıonaty ótken edi.
Ilonnyń ekinshi chıpi
«Neuralink» óziniń mı chıpin ekinshi adamǵa sátti ımplantasııalady. Bul týraly kompanııa ıesi Ilon Mask aıtty.
Qazir «Neuralink» julyn jaraqattary bar adamdarǵa kómektesýge arnalǵan qurylǵysyn synap jatqanyn bilemiz. Birinshi chıp ornatylǵan Arbo qurylǵynyń kómegimen beıneoıyndar oınaýǵa, ınternetti sholýǵa, noýtbýkta kýrsordy jyljytýǵa shamasy jetken-tuǵyn. Al ekinshi naýqas týraly málimet az. Mask bul adamnyń julyn jaraqaty bar ekenin, úderistiń sátti ótkenin ǵana aıtty. «Neuralink» bıyl taǵy segiz adamǵa klınıkalyq ımplant salmaqshy.
Tik kógal
Ulybrıtanııa ǵalymdary «Tik kógal» jobasyn bastady.
Ulybrıtanııada árbir altynshy ósimdik joıylyp ketý qaýpinde tur. Sol sebepti de jergilikti ekologter «Tik kógal» atty tyń jobany qolǵa alǵan. Ol ósimdikterdi ǵana emes, janýarlardy da saqtap qalýǵa kómektesedi. Ekologııalyq jaǵynan tıimdi kógal kómirtekti kóbirek sińirip, aýany tazartady. Ystyqty basady. Qalanyń kórkin ashady. Ári oryndy az alady. Bul týraly «Buryndary jarnama taqtalarynyń astynda bos keńistik qalyp qoıatyn. Qazir ony jasyl qabyrǵalarmen toltyrdyq. Demek endi ósimdikterdi egetin oryn izdep álek bolmaımyz», deıdi joba avtory Alıster Loý.