Keshe Astanada «Qazaqstan – О́zbekstan» bıznes forýmy ashyldy. Atalǵan is-shara barysynda Qazaqstan Premer-mınıstriniń orynbasary Serik Jumanǵarın eki el ózara saýda aınalymyn 10 mlrd dollarǵa jetkizýdi kózdep otyrǵanyn málimdedi.
«2023 jyldyń qorytyndysy boıynsha 7-orynǵa turaqtaǵan О́zbekstan Qazaqstannyń iri saýda seriktesiniń biri ekenin kórsetti. Qazaqstannyń Ortalyq Azııa elderimen jalpy saýda aınalymynyń 57%-dan astamy О́zbekstanǵa tıesili. Keıingi 5 jylda ekijaqty taýar aınalymy 29%-ǵa ósip, 2022 jyly 5 mlrd dollar kólemine jetti. Bizge saýdadaǵy máselelerdi júıeli sheshý jáne saýda aınalymynyń jańa ósý núktelerin tabý qajet. Osylaısha, memleketterimizdiń basshylary qoıǵan maqsat – ortamerzimdi kezeńde 10 mlrd dollarǵa qol jetkizýge talpynýymyz kerek», dedi S.Jumanǵarın.
О́zbekstan Premer-mınıstriniń orynbasary Jamshıd Hodjaev mundaı is-sharalar ekijaqty yntymaqtastyqty nyǵaıtýǵa qýatty serpin beretinin atap ótti. Ol Qazaqstan О́zbekstannyń negizgi ekonomıkalyq seriktesteriniń biri ekenin atap ótti.
«Álemdik qaýymdastyq bizdiń óńirlerge birtutas naryq prızmasy arqyly qaraıdy. Sizderdi iri jahandyq brendterdi tıimdi tartý úshin kúsh-jigerimizdi biriktirýge shaqyramyn», dedi ol.
Eki el arasynda ónerkásiptik kooperasııa belsendi túrde damyp keledi. Bul 3,1 mlrd dollar somasyna 69 joba, 14,7 myńnan asa jumys ornyn qurýdy kózdeıdi. Qazirdiń ózinde 217 mln dollar somasyna 12 birlesken joba sátti júzege asyryldy. Buǵan turmystyq tehnıka, júk jáne jeńil avtokólikter, traktorlar óndirisi kiredi. Belsendi fazada 178 mln dollardan asa somaǵa úsh ınvestısııalyq joba iske asyrylyp jatyr. Olardyń qatarynda Taraz qalasyndaǵy qýaty 500 myń tonna bolat ónimin shyǵaratyn elektr metallýrgııalyq zaýyt pen Shymkent qalasynda ınfýzııalyq eritindilerdi óndirý bar.
О́zbekstan Qazaqstanǵa jemis-kókónis ónimderiniń negizgi jetkizýshisi sanalady. Áleýmettik mańyzy bar agroónerkásiptik ónimderdi О́zbekstannan jetkizýdi damytý úshin tez buzylatyn taýarlardy tasymaldaý kezinde «UZKAZTRADE» birlesken kásipornyna qozǵalys basymdyǵyn berý múmkindigi qarastyrylady.
«Qazaqstan – О́zbekstan» bıznes forýmyna eki eldiń ulttyq kompanııalarynyń, isker toptary men memlekettik organdarynyń 450-den asa ókili qatysyp jatyr.