Astana qalasynda 8-14 qyrkúıek aralyǵynda ótetin V Dúnıejúzilik kóshpeliler oıyndaryna oraı «Uly dala joryǵy» halyqaralyq marafon-báıgesi ótedi. 10-nan asa elden keletin atbegiler jer apshysyn qýyryp, tuıaǵymen topyraqty týraıtyn tulparlaryn 500 shaqyrymǵa aıdamaq.
Etnosport dodasynyń kórigin qyzdyratyn halyqaralyq marafon-báıgede Iran, Túrkııa, Majarstan, Qyrǵyzstan, Ońtústik Afrıka Respýblıkasy, Reseıden keletin shabandozdar dalany dúbirge bóleıdi.
Qyrǵyzstannyń atbegileri «Uly dala joryǵy» halyqaralyq alamanǵa qosatyn attaryn da erekshe ázirlikten ótkizip, baptap jatyr. Tipti onkúndik at sporty marafonyn da uıymdastyryp, kúnshilik jerge aıdaǵanda «erteden salsań, keshke ozatyn» qylquıryqtaryn iriktep alǵan. Qyrǵyzstan At sporty federasııasynyń vıse-prezıdenti Manas Sultanov «Uly dala joryǵy» marafon-báıgesine shaqyrtý alǵanda erekshe qýanǵanyn, qyrǵyz atbegileriniń baptap otyrǵan júırikterin synaıtyn alaman ekenin jetkizdi.
«Qazaqstanda Dúnıejúzilik kóshpeliler oıyndarynyń qarsańynda ótetin halyqaralyq dodaǵa qosatyn tulparlarymyzdy irikteý ádiletti ótti. 300 shaqyrymdyq qashyqtyqqa «Kochmondor jýrýshý» irikteý marafony uıymdastyryldy. Buryn-sońdy mundaı halyqaralyq saıys bolǵan emes. Demek shyn júırikke tusaý bolmaı, tek tulparlar súrinbeı kómbeden kórinsin demekpin. Baby men baǵy qatar janǵan atbegi men shabandozdyń juldyzy jarqyraıtyny anyq. Barlyq qatysýshyǵa sáttilik tileımin», dedi M.Sultanov. Marafon-báıge 5 myń jyldan asa ýaqyt buryn adam balasy jylqy malyn alǵash ret qolǵa úıretken Soltústik Qazaqstan oblysyndaǵy Botaı eldi mekeninde 3 qyrkúıekte bastaý alady.
«Uly dala joryǵyna» Kabardın-Balqar Respýblıkasynyń atbegileri de júırigin baptap, ázirlikti kúsheıtip jatyr. «AMD Kavkaz» at sporty klýbynyń negizin qalaýshy Ahed Mahov bul jylqy janýarynyń tózimdiligin synaıtyn doda ekenin aıtty.
«Biz syryn qoınaýyna jasyrǵan, shejirege toly qazaq dalasynda ótetin tartysqa qatysýdy zor mártebe tutamyz. Tulparlarymyzdy baptaýdy qolǵa alyp jatyrmyz», dedi A.Mahov.
Ulttyq sport qaýymdastyǵyna qaraıtyn «Joryq» respýblıkalyq federasııasy uıymdastyratyn halyqaralyq marafon-báıgeniń jeńimpazdary 8 kyrkúıekte Dúnıejúzilik kóshpeliler oıyndarynyń ashylý saltanatyna qatysady.