Qyzan men Aqshymyraý – Mańǵystaý óńirinde eń shette, oblys ortalyǵynan – 300, aýdan ortalyǵynan 110 shaqyrym qashyqta jatqan aýyldar. Búginde osy aýyldardyń halqy jergilikti ákimder men sý mekemeleri basshylarynan qaıyr bolmaǵannan keıin Qashaǵan jyrlaǵandaı «Adyra qalǵyr aspannan, jaýyn suraýda qudaılap».
Sý tapshylyǵy – aýyldarda jyl saıyn aıtylyp kele jatqan ózekti másele. Aldyńǵy jyly da osy másele qaıta kóterilip, aýdandyq, oblystyq gazetterge «Sý joq, shý kóp» degen maqala jazyp, aýdan ákiminiń sol kezdegi orynbasary Abzal Sarbalaev eldi mekenderge sý jetkizýdi rettep bergen edi. Byltyr sýdan tapshylyq bolǵan joq. Al bıyl naǵyz 40 kún shildede qarapaıym halyq «balapan basyna, turymtaı tusyndanyń» kúıin keship, árkim tabylǵan kóligine plastmassa ydys artyp, jan-jaqqa qańǵyp ketti.
Qyzan, Aqshymyraý sýyn aýdan ortalyǵy Shetpedegi «Darııa» mekemesine qosqannan keıin sý tapshylyǵy qaıta órship ketti. Kúnara 2 saǵattaı sý jiberedi, onda da tek túske deıin. Eki saǵatta 200 lıtr sý ala almaımyz. О́ıtkeni berilgen sýy tamshylap qana aǵady. 110 shaqyrym jerdegi mekemege qosqanda «Darııa» ǵana paıda kórip otyrǵan shyǵar. Al shyryldaǵan halyq sýǵa jarymaı, sergeldeńmen kún ótkizip júr.
Aýyl arasynda jeke 4 tonnalyq kólikpen 1500 teńgege sýdy satyp beretinder de bar. Al aýdanda sý tapshy bolsa, bul «baılyq» qaıdan tabylady? Sonda bular qoldan aqsha jasap, halyqty shóldetý arqyly paıda tappaq pa? Sý alý úshin aýyldarǵa oblys ákimderi men orynbasarlaryn shaqyryp turý kerek sııaqty. Sebebi kúnde tamshylap, jylap aǵatyn sý ákim qaralar kelgende parlap ketedi.
Ǵylym men tehnıkamyz damyp keledi dep jıi maqtanamyz. Sóıte tura HHI ǵasyrda ómir súre otyryp áli kúnge deıin aýyl halqy jańbyr sýy men qar sýyna, qala berdi qudyq sýyna táýeldi bolyp otyrǵany janǵa batady.
Jetkinshek ÁÝELBAIULY,
ardager ustaz
Mańǵystaý oblysy