«Research and Development Solutions-RDS» – óńirimizdegi baǵdarshamǵa jaýapty birden-bir kásiporyn. Shahtınsk, Temirtaý, Qaraǵandy, Saran qalalaryna ornatylyp jatqan jol rettiligin retteıtin baǵdar baǵanalaryn ózimizdiń jergilikti kásiporyn shyǵaratyny qýantady.
Kompanııa jol qozǵalysyn basqarýdyń zamanaýı tehnıkalyq quraldaryn engizý arqyly joldaǵy qozǵalys qaýipsizdigin jaqsartýdy kózdeıdi.
«Karagandaavtotranssıgnal» JShS tarıhy 1971 jyldan bastaý alady. Sol jyly óz jumysyn «Gordorstroı» basqarmasyna qarasty ýchaskeden bastady. 1977 jyly Qaraǵandy oblysynyń mamandandyrylǵan montajdaý-jóndeý basqarmasy negizinde qaıta quryldy. 1988 jyly SMEÝ Qazaq KSR IIM Memlekettik avtoınspeksııasy Bas basqarmasynyń «Qazavtotranssıgnal» respýblıkalyq tresiniń quramyna endi. 1993 jyly trest «Avtotranssıgnal» AQ bolyp qaıta quryldy. Onyń quramyna Qaraǵandydaǵy bólimshesi retinde qosyldy.
1999 jyly 31 naýryzda aksıonerlik qoǵam múlkiniń, quqyqtary men mindetteriniń bir bóligin bólý arqyly «Avtotranssıgnal» JAQ qaıta qurý jolymen «Qaraǵandyavtotranssıgnal» atansa, 2004 jyldyń shildesinde JAQ «Qaraǵandyavtotranssıgnal» JShS bolyp qaıta quryldy. Sodan beri «Research and Development Solutions – RDS» degen ataýmen Qaraǵandy oblysyndaǵy kólik qozǵalysyn uıymdastyrý sekildi mańyzdy salaǵa ábden mamandanǵan kásiporynǵa aınaldy.
«Kásiporynda 50-ge jýyq jumysker bar. Kóbi jol qozǵalysy qaýipsizdigin qamtamasyz etetin salada kóp jyldyq eńbek tájirıbesi bar, biliktiligi, bilimi joǵary kásibı mamandar. О́rlegen óndiristik áleýettiń arqasynda kompanııamyz joǵary bıznes standarttaryn qalyptastyryp, ınnovasııalyq sheshimder men tehnologııalar engizýdi yntalandyra otyryp, salany damytýǵa úles qosyp keledi. Bizdiń kompanııa tutynýshylardyń qajettiligin barynsha qanaǵattandyrý úshin kórsetiletin jumystar men qyzmetterdi úzdiksiz jańartyp otyrady», deıdi kásiporyn basshysynyń orynbasary Nurjan Samıtov.
Qazirgi ornatylyp jatqan baǵdarshamdar sheteldiki. Biraq oǵan qajetti qosalqy bólshekter, arnaıy jabdyqtar jergilikti kásiporyndardan satyp alynady. Otandyq óndiris oryndarymen kelisimshart jasalǵan. Máselen, Maıqudyqtaǵy «Energosıstemy ELTO», Sarandaǵy «Kazcentrelectroprovod», «О́rnek NS» JShS, «Ular MK», RSÝ, «Agrodor» kompanııalarymen tyǵyz baılanysta.
Kompanııa ıntellektýaldy kólik júıelerin engizý jáne tehnıkalyq qamtamasyz etýmen qatar jol belgilerine arnalǵan tirekterdi de jasaıdy. Bul maqsatta otandyq kompanııalardyń ónimderin paıdalanady. Baǵdarshamdardy ornatyp, ony kútip ustaý, avtomattandyrylǵan qozǵalysty basqarý júıesin engizip, tehnıkalyq turǵydan qamtamasyz etý – kásiporynnyń negizgi mindeti.
Munymen qosa, osy uıymnyń quzyretine keri sanaq tablosy, arnaıy dızaındaǵy jol belgileri men bılbordtar, jasandy jol budyrlary, jol jıegindegi metall qorshaýlardy jetkizý jáne ornatý qyzmeti kiredi. Shamamen bir-eki jyl buryn kásiporyn kórý qabileti nashar jaıaý júrginshiler úshin dybystyq belgi berý qurylǵysyn engizgen edi.
«Kelisimshart negizinde 162 baǵdarshamdy kútip ustaýdy mindetimizge aldyq. Degenmen Qaraǵandy qalasy boıynsha 200-deı baǵdarshamǵa jaýaptymyz. Búginde oblys ortalyǵynda jaıaý júrginshiler ótetin jerlerge 518 arnaıy dybystyq belgi berý qurylǵysymen jabdyqtalǵan áleýmettik baǵdarsham mektep, aýrýhana mańaıyna ornatyldy», deıdi kásiporynnyń baǵdarsham sharýashylyǵy bóliminiń basshysy Vladımır Plotov.
Jarty ǵasyrlyq tarıhy bar kásiporyn oblystyń jol polısııasymen tyǵyz baılanys ornatqan. Jol qozǵalysynyń qaýipsizdigin qamtamasyz etý boıynsha jumystyń barlyq túrin atqarýdy jalǵastyra bermek.
Aıta keterlik jaıt, mekemede bos jumys oryndary bar. Júrgizýshi, elektrjóndeýshi, dánekerleýshi mamandarǵa esigi ashyq.
Qaraǵandy oblysy