Shertpe kúı degende Ábiken Hasenulynyń esimin jıi eske túsedi. Alaıda kóp aıtyla bermeıdi. Ol kisiniń ǵalamat kúıshiligimen qatar, kisilik kelbeti ári óte talantty ártis bolǵany týraly derekter keıin de shyǵyp jatyr. Buryndary ashyq derekkózderde teatrda ártis bolǵany jóninde jáne basty rólderdi somdaǵany týraly derekter kóptep ushyrasar edi. Al kúıshi Janǵalı Júzbaıdyń bertindegi jazbasyna úńilgen adam Ábiken Hasenuly zamanynda Qazaq drama teatrynda (Qazirgi M.Áýezov atyndaǵy memlekettik akademııalyq drama teatry) mańdaıaldy akterdiń biri bolǵanyn biledi.
«1934 jyly Sáken Seıfýllınniń kómegimen teatrǵa jumysqa qabyldanǵanda, Ábikenniń baǵyna qaraı teatr dırektory Orynbek Bekov edi, bul ekeýi aýyldas ári burynnan múddeles jandar bolatyn. Orynbek Bekov (1898-1938) «Alash» partııasynyń múshesi bolǵan, 1930 jylǵy «Shet qozǵalysyna» Ábikenmen birge qatysqan. Keıin qyzyl ókimettiń quzyryna ótip, baspasóz, mádenıet salasynda eńbek etken. Jazýshy, dramatýrg, synshy. Jumysqa qabyldanýyna Muhtar Áýezov te tilektestik tanytqan, ol Ábikenniń kúıshilik ónerin erterekten, Semeı kezeńinen jaqsy biletin, sondyqtan teatr ákimshiligine jazýshy sóziniń de salmaǵy ótken sekildi. Dalalyq týma daryny arqasynda ol teatr sahnasyna, akterlik sheberlikke tez beıimdeledi. Qazaq drama teatry sahnasynda Qunanbaı (M.Áýezov. L.S.Sobolev. «Abaı»), Qaramende (M.Áýezov. «Eńlik-Kebek»), Qodar (Ǵ.Músirepov. «Aqan seri-Aqtoqty»), Musa (S.Muqanov. «Shoqan Ýálıhanov»), Taıman (Á.Tájibaev «Maıra»), Balqy (M.Aqynjanov. «Isataı men Mahambet») obrazdaryn somdap kórermen qaýymnyń rızashylyǵyna bólenedi», deıdi kúıshi J.Júzbaı.
Talanttyń aty – talant. Talantty adam qaı jerde ne istese de, ultqa, kóptiń upaıyna, sapaǵa qyzmet etedi. Buǵan deıin kúıshi Ábikenniń el ishinde kósheli azamat bolǵany týraly áńgimelerdi qulaq shalatyn. El men jerdiń namysy degende qarap qalmaıtyn azamattyǵy týraly derekterdiń birsypyrasy keıin de kórinip, shyǵa bastaǵany sonyń dáleli.
«1930 jyly qazirgi Qaraǵandy oblysy Shet aýdanynda keńes ókimetine qarsy áıgili Betpaqdala kóterilisi bastalady. Kóterilistiń kósemderi, Alash qaıratkerleri – Jaqyp Aqbaev, Álimhan Ermekovter edi. Áskerı qozǵalystyń bas sardary bop Erkebek Dúısenov saılanady. Tarıhshylar Turǵanbek Allanııazov pen Amangeldi Taýkenovtiń «Shetskaıa tragedııa» atty kitabynyń «Delo Dıýsenova» bóliminde Erkebek Dúısenov pen Jaqyp Aqbaevtyń eski dostar ekendigi jazylady. Osy kitapta Alash qozǵalysyn basyndaǵy 40 kisiniń ishinde Ábikenniń de aty atalady: «...Iz Shetskogo raıona: Ospanov Kaırberlı, Ibyshev Maýlen, Norbaev Mýkash, Dıýsenov Erkebek, Hasenov Abekan, Balgojın Jýnýsbek, Bodýkov Karymbek» (Allanııazov.T.K. Taýkenov A.S.Shetskaıa tragedııa. Iz ıstorıı voorýjennyh vystýplenıı v Sentralnom Kazahstane v 1930-1931 GG. Almaty: Fond «XXI vek», 2000 g.164 str. 26-bet).
Bul jerde hattama toltyrýshynyń jazýymen kúıshiniń aty-jóni «Hasenov Abekan» dep qate jazylyp ketken, solaı bola tura «ábikentanýda» bul asa mańyzdy qujat bolyp tabylady», deıdi Janǵalı Júzbaı.
Ábiken Hasenulynyń ómir jolyna oı kózimen úńilgender qazaq halqy basynan keshken qaıǵy-qasirettiń bári kúıshini aınalyp ótpegenin jáne ómirine tereń iz salǵanyn júregimen sezedi. Tipti kúıshiniń tiri qalǵanynyń ózi tańǵalarlyq jaıt. Ol 1930 jyldardaǵy ujymdastyrý kezindegi áperbaqandyqqa kýá bolyp qana qoıǵan joq, ustazy Ábdı syndy kúıshilerdiń jazyqsyzdan jazyqsyz atylǵanyn kórdi. Ábdı ózin keńestik jendetter ataıyn dep turǵanda, «keýdemde kúı ketip barady, jalǵyz-aq tilegim – Ábiken degen balany shaqyryńdarshy, úırenip alyp qalsyn» dep aqtyq tileýin aıtady. Ábdı bir tartyp bolǵanda, Ábiken ekinshi ret tartýyn ótinip, ekeýi jylap aıyrylysqan. Mundaı sumdyqty kórgeni azdaı kúıshiniń otbasy bul aıdaýda júrgende ashtyqtan qyrylyp qalady. Kelip múrdelerin qushyp qalady. Osylaısha, keńes ókimetiniń zulymdyǵyn jan-júıesimen sezingen Á.Hasenuly ustazy Ábdıden qalǵan álgi kúıdi tek bertinde, soǵystan keıingi jyldary ǵana tartyp, taspaǵa jazǵan. El ishindegi osynshama qubylysty jan-júreginen ótkizip, aqylynda qorytqan Ábikennen qalǵan jalǵyz-aq kúı – «Qońyr». Kúıdi qadirlegen Ahmet Baıtursynuly, Sáken bastaǵan serkeler atylyp ketip jatqanyn bilgen Ábikenniń bul kúıinde kúlli qazaq dalasynyń qaıǵy-qasireti men ókinishti, azaly zary turǵan joq pa? Ahmet Baıtursynuly bastaǵan Alash arystarynyń aldynda Táttimbettiń «Jantelim» kúıin shertkende, Aqań «óz aty da jaman emes, alaıda kókeıdi tesip turǵan kúı eken. Budan bylaı «Kókeıkesti» dep tartshy» dese kerek. Demek Alashtyń osyndaı qaıratkerlerinen bata alyp, yqylasyna jaryp, keıin olardyń ornyn sıpap qalǵan Ábikenniń «Qońyry» qazaq turǵansha tyńdala beretin kúı. Ony tek kóńil kózin ashyp tyńdaý kerek.