ÚZDIK OQÝShYLARǴA MORALDYQ QOLDAÝ QAJET
Parlament Májilisiniń jalpy otyrysynda depýtattar Ramazan Sárpekov pen Gúlmıra Isimbaeva Bilim jáne ǵylym mınıstri Janseıit Túımebaevqa saýal joldady, dep habarlady osy palatanyń baspasóz qyzmeti.
Saýalda bylaı delinedi: “Bir-eki kúnnen soń mektep bitirýshilerge attestat tapsyrý rásimi ótetini belgili. Sońǵy kezde ulttyq biryńǵaı testileýdiń nátıjesi boıynsha 1-2 ball jetpeı qalǵan “Altyn belgige” úmitker oqýshylar jaıynda ózińizge birneshe saýal joldadyq, biraq áli jaýap túsken joq. Máseleniń qalaı jáne qashan sheshimin tabatynyn tek biz ǵana emes, bizge senim artyp habarlasqan jáne qabyldaýymyzda bolǵan ata-analar da kútip otyr.
Kópshilikti qatty oılandyryp otyrǵan másele – mektepte 11 jyl boıy tek úzdik oqyǵan oqýshynyń biryńǵaı testiń qorytyndysy boıynsha bir “tórt” degen baǵaǵa bola “Altyn belgi” turmaq, erekshe (qyzyl) attestatqa ıe bola almaýy. Al, 10-11 synypty ǵana úzdik oqyǵan oqýshyǵa mundaı attestat beriledi. Bizdiń oıymyzsha, mundaı jaǵdaı – “Altyn belgige” úmitker bolǵan oqýshy úshin ádiletsizdik. Olar materıaldyq dúnıe surap otyrǵan joq, tek eńbekterine sáıkes joǵary dárejedegi attestatqa qol jetkizýdi qalaıdy. Másele osylaı sheshilgen jaǵdaıda munyń úlken ómir jolyna qadam basyp, aldyna zor úmit qoıyp otyrǵan úzdik oqýshylarǵa moraldyq qoldaý bolatyny sózsiz.
Sondyqtan 1 synyptan bastap tek qana úzdik oqýdy maqsat etip, erekshe bilim deńgeıimen daıarlanyp kelgen “Altyn belgige” usynylǵan oqýshylarǵa qolushyn berýge kim de bolsa mindetti dep esepteımiz.
Ýaqyttyń tyǵyzdyǵyna baılanysty osy máselege tezirek kóńil aýdaryp, qabyldaǵan sheshim jaıynda jazbasha túrde habar berýińizdi suraımyz”.