ORAL. 12 maýsym. Batys Qazaqstan oblysynyń ákimi Nurlan Noǵaevtyń ókimimen Ádil Taýfıquly Jolamanov Aqjaıyq aýdanynyń ákimi bolyp taǵaıyndaldy. Bul týraly egemen.kz tilshisi habarlady.
Aýdandyq máslıhat depýtattary oblys ákiminiń Ádil Jolamanovty Aqjaıyq aýdanynyń basshysy etip taǵaıyndaý týraly usynysyn biraýyzdan maquldady.
Al búginge deıin atalǵan aýdannyń ákimi bolyp kelgen Narıman Tóreǵalıev basqa jumysqa aýysýyna baılanysty, qyzmetinen bosatyldy. Ol bul qyzmetke 2012 jylǵy naýryz aıynda kelgenin aıta keteıik. Oblys basshysy jemisti qyzmeti úshin oǵan alǵysyn bildirip, jańa ákimdi aýdan aktıvine tanystyrdy. Sondaı-aq, óńir basshysy Ádil Jolamanovqa ákimdik mindetin abyroımen atqarýyna tilektestigin bildirdi.
Ádil Jolamanov Batys Qazaqstan oblysy, Syrym aýdanynda 1968 jyly týǵan. Eńbek jolyn týǵan jerinen bastaǵan ol Syrym aýdany ákiminiń orynbasarlyǵyna deıin kóterildi. 2014 jylǵy mamyrdan beri Batys Qazaqstan oblysy aýyl sharýashylyǵy basqarmasy basshysynyń orynbasary qyzmetin atqaryp keldi.
Temir Qusaıyn.
Derek: egemen.kz.
Sýret: ruinformer.com.