Osy jyldyń 15 tamyzy men 15 qyrkúıek aralyǵynda respýblıkalyq eko-aksııa ótedi, dep jazady Egemen.kz.
Mádenıet jáne aqparat mınıstrligi qoǵamdyq eko-baqylaý tórt taqyryp aıasynda ótkiziletinin habarlap, ýaqyt kestesin jarııa etti:
Týrıstik jáne tarıhı-mádenı nysandardyń eko-monıtorıngi aptalyǵy (15-22 tamyz); Abattandyrý, onyń ishinde jasyl jelekterdi kútý jáne sýarý salasyndaǵy eko-monıtorıng aptalyǵy (23-30 tamyz); Stıhııalyq polıgondardyń eko-monıtorıngi aptalyǵy (31 tamyz - 7 qyrkúıek); Jer qoınaýyn paıdalaný obektileriniń eko-monıtorıngi aptalyǵy (8-15 qyrkúıek).Aksııaǵa el aýmaǵynda 1,5 myń adam qatysyp, 300-den asa monıtorıngtik shara ótedi dep josparlanyp otyr.
Aýqymdy aksııa Astana qalasynda («Bozoq» murajaı-qoryǵy), Almaty oblysynda («Kólsaı kólderi» ulttyq parki), Túrkistan oblysynda («Áziret Sultan» murajaı-qoryǵy) qoǵamdyq monıtorıng júrgizý sheńberinde bastaý aldy.