Halyq qaharmany Máskeýde ulyqtaldy

Qazaqstannyń Reseı Federa­sııasyndaǵy elshiligi, «Halyq­tar dostyǵy men ulttyq máde­nıetterdiń damýyn qoldaı­tyn «Astana» qorynyń» uıym­das­tyrýymen ótken is-shara­nyń bas­ty maqsaty – Halyq qaharmany, qazaqtyń aty ańyz­ǵa aınalǵan tuńǵysh ushqysh qyzy Hıýaz Dos­pa­­novanyń erligin ulyqtaý.

Avtorlyq ánder keshine jı­nalǵan kórermenniń qarasy qa­lyń boldy. Olardyń basym bó­ligi – kezinde túrli jaǵ­daımen Re­seı­ge qonys aýdarǵan, taǵdyr-ta­laıy­men sol jaqta qalǵan qazaq­tar. Máskeýde bilim alyp júrgen jas­tarymyz da osy keshtiń basy-qasy­nan tabyldy. Kórshi elde tu­ryp jatqan qyrǵyz, ózbek, tatar, qa­ra­qalpaq sekildi ózge etnos ókil­deri de atalǵan konsertti uıyp tyńdady.

Sahna shymyldyǵyn Jumeken Nájimedenovtiń sózine jazylǵan Shámshi Qaldaıaqovtyń «Beıbit kún tilegi» ánimen ashqan Sáýle Stahanshylqyzy osynaý keshtiń mańyzy erekshe ekenine toqtaldy.

– Biz beıbit kúndi syılap ketken, Jeńis kúnin jaqyndatqan, fashızmge qarsy jan aıamaı soǵysqan árbir jaýyngerge qaryzdarmyz. Máskeý tórindegi búgingi kesh – sol batyr-babalarymyzǵa arnalǵan taǵzym keshi bolmaq, – dedi ánshi, kompozıtor.

Budan soń kórer­menderge Hıýaz Dospanova týraly sha­ǵyn beınefılm kórseti­lip, dańqty ushqyshtyń qurmeti­ne arnalǵan Sáýle Janpeıisova­nyń «Hıýaz» ániniń tusaýy kesil­di. Ánniń sózin jazǵan aqyn Nur­sultan Myqtybaı keshke arnaıy qatysyp qana qoımaı, atal­ǵan keshtiń tizginin ustady. Ándi Hıýaz Qaıyrqyzynyń jer­lesi ári kompozıtordyń shákirti, Qurmanǵazy atyndaǵy Qazaq ult­tyq konservatorııasynyń 4-kýrs stýdenti, Abaı atyndaǵy mem­lekettik opera jáne balet teatrynyń solısi Shyńǵys Nurǵa­lıuly oryndady.

– Qan maıdanda jaýmen alysyp, talaı márte ólim aýzynan aman qalǵan Hıýaz apamyzǵa arnalǵan án osydan eki jyl buryn 100 jyldyq mereıtoıyna oraı shyqqan bolatyn. Biraq halyqqa usynýdyń sáti búgin túsip otyr, – dedi Qazaqstannyń eńbek sińirgen qaıratkeri.

Jeztańdaı ánshi keshte halyq ánderi, Abaı, Muhıt, Ǵa­rı­folla shyǵarmalarynan bólek, Pýshkın men Esenınniń «Tatıa­nanyń haty»,  «Qara sháli» sekildi ózi ánin jazǵan ataqty týyndylardy oryndap, orys, qyrǵyz, noǵaı tilderinde án shyrqady. Máskeýlik kórermen «Jan áke», «Farıza – jyr bıik», «Kók nóser», «Tuǵyr» sekildi avtorlyq ánderin jyly qabyldap, qoshemet tanytty. Sondaı-aq Reseıde turatyn Qa­­zaqstannyń eńbek sińirgen má­denıet qyzmetkeri Tatıana Pol­­tavskaıa, Reseıde turatyn jáne bi­lim alyp jatqan Gúlnar Qos­­pa­qo­­va, Gúlbaný Muratova, Dına­ra Seı­tesheva, Gúlsáýle Údilbekova, Aq­bermet Aınaqulova, Gúljanar Bı­muǵambetova, Erkin Saıajan, As­hat Oralbekov, Abzal Tastanbek, Aıjamal Asqarova óner kórsetip, án men bıden shashý shashty.

Máskeýde bastalǵan is-shara artynsha Halyq qaharmanynyń kindik qany tamǵan týǵan jerinde jalǵasty. Atyraý oblysynyń Qurmanǵazy aýdanyndaǵy Hıýaz aýylynyń mádenıet úıinde qazaq­tyń «qanatty qyzyna» arnalǵan «Hıýaz» áni oryndalǵan sátte zal toly kórermen oryndarynan tik turyp, ystyq yqylasyn bildirdi.

Aıdyn ÁBDIHALYQ