Árbir sábı baqytty ómir súrýge quqyly. Taǵdyrdyń taýqymetin keshse de, jaqsylyqtan kúder úzbeýi kerek. Osy rette Jetisý óńirinde balalardy ońaltý ortalyǵy jumys isteıdi. Bul mekemelerde bir mezgilde 500-deı bala em ala alady. Olarǵa bilikti mamandar qyzmet kórsetedi. Zamanaýı qural-jabdyqtarmen tolyq jaraqtanǵan nysandar talaı balaǵa keshendi qoldaý kórsetip, densaýlyǵyn ońaltýǵa sep bolyp otyr.
Erekshe kútimdi qajet etetin balalarǵa saýyqtyrý ortalyqtary aýadaı qajet. Máselen, munda psıhonevrologııalyq patologııasy, tirek-qımyl apparaty buzylǵan bir jarym jastan on segiz jasqa deıingi múgedek balalarǵa bıýdjet qarajaty esebinen arnaýly áleýmettik qyzmet kórsetedi. AVA terapııasy, emdik massaj, deneshynyqtyrý, sý rásimderi jáne tıimdi ońaltýǵa qajetti basqa da ádister qoldanylady. Osyndaı nysannyń biri Úsharal qalasynda ornalasqan «Jansaıa» kúndizgi ortalyq 50 orynǵa arnalǵan.
Ortalyq ashylǵanǵa deıin Alakól aýdanynda múgedektigi bar balalarǵa arnalǵan mundaı ońaltý nysany bolǵan joq. Ata-analar óz qarajatyna balalaryn Almaty, Astana qalalaryna ońaltýǵa aparyp júrgen. «Jansaıa» ortalyǵy ashylǵannan keıin qazir másele jergilikti jerde sheshimin taýyp, ortalyq balalarǵa tegin qyzmet kórsetip jatyr.
Áleýmettik nysanǵa kelýshi ata-analardyń biri, Úsharal qalasynyń turǵyny Aıgúl Karımova qyzy Ámınanyń osy ońaltý ortalyǵynan em sharalaryn alyp júrgenine eki jylǵa jýyqtaǵanyn aıtady.
«Balam ortalyqqa alǵash kelgen kezde júrmeıtin, qazir júredi. Munda bilikti mamandar jumys isteıdi. Olardyń qyzmetterine rızamyn, alǵysym sheksiz. Bul jerde qyzym emdik deneshynyqtyrý, eńbek, mýzyka sabaqtaryna qatysady, massaj alady, balamen logoped, psıholog, defektolog mamandar jumys isteıdi. Mundaı keshendi em sharalary balamnyń densaýlyǵyna oń áserin tıgizip otyr», deıdi A.Karımova.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetine qaraǵanda, munda «Imıtron» serýendeý trenajeri, neıro-ortopedııalyq ońaltýǵa arnalǵan kombınezon, qadamdyq trenajer, tirek ramasy, fızıoterapııalyq quraldar sııaqty ońaltý jabdyqtarymen qamtylǵan. 50 orynǵa arnalǵan «Jansaıa» ortalyǵy 2022 jyldyń tamyz aıynda ashylǵan. Ortalyqta 57 adam jumys isteıdi.
Qazir ortalyqta 35 bala ońaltýdan ótip jatyr. Al oblystaǵy jalpy sany 6 ońaltý ortalyǵynda 380 bala arnaıy áleýmettik qyzmet alady.
Aıta keteıik, jalpy 6 balalardy ońaltý ortalyǵynyń beseýi Jetisý oblysy qurylǵannan keıin ashyldy.
Jetisý oblysy