Premer-mınıstr Oljas Bektenovtiń tóraǵalyǵymen ótken keńeste áleýmettik nysandar men ınfraqurylymdy qalpyna keltirý, sondaı-aq sý tasqyny saldarynan zardap shekkenderge turǵyn úı salý jáne satyp alý máseleleri qaraldy.
О́nerkásip jáne qurylys, Oqý-aǵartý, Densaýlyq saqtaý, Energetıka, Kólik mınıstrlikteriniń basshylary men birqatar oblys ákimderi sý tasqyny saldaryn joıý jumystarynyń barysy týraly baıandady. Apatty dep tanylǵan 8 650 úıdiń ıesine qaıtalama naryqtan úı satyp alynyp nemese jańasy salynyp jatyr. О́nerkásip jáne qurylys mınıstri Qanat Sharlapaevtyń aıtýynsha, 2 569 jańa úı salynyp jatyr, olardyń 619-y tolyqtaı daıyn. 2 431 úıdiń irgetasy turǵyzyldy, 2 207 úıdiń qabyrǵasy qalandy, 2 007 nysannyń shatyry jabyldy.
Jóndelýge tıis 9 189 nysannyń 8 939-ynda (97%) jumystar aıaqtalǵan. Satyp alýǵa josparlanǵan 6 081 úı men páterdiń búginde 4 918-i (81%) satyp alyndy.
Premer-mınıstr sý tasqyny saldaryn joıý jáne azamattardyń múlkin qalpyna keltirýde belsendi jumys júrgizilse de, bekitilgen kestelerden keshigý faktileri bar ekenine toqtaldy.
«Memleket basshysynyń sý tasqynynan zardap shekkenderdi ýaqtyly turǵyn úımen qamtamasyz etý jónindegi mindeti merziminde oryndalýǵa tıis. Respýblıkalyq shtab qajetti sheshimderdi qabyldady, qarjy tolyq kólemde bólindi. Barlyq resýrsty jumyldyryp, jumysty jandandyrý qajet», dep atap ótti Oljas Bektenov.
Sondaı-aq Úkimet basshysyna áleýmettik nysandardy qalpyna keltirý jumystary týraly baıandaldy. Sý tasqyny saldarynan elimizdiń 6 óńirinde 11 myńǵa jýyq bala oqıtyn 40 bilim uıymy zardap shekti. Bul baǵytta da qalpyna keltirý jumystary belsendi atqarylyp jatyr.
Aqtóbe oblysynda 8 nysanǵa kúrdeli jáne aǵymdaǵy jóndeý jumystary júrgizilip jatyr. Úkimet rezervinen 6 jańa bilim mekemesiniń qurylysyna 6,2 mlrd teńge bólindi. Atyraý oblysyndaǵy 6 nysanda jóndeý jumystary 50%-ǵa aıaqtaldy. Sonymen qatar balabaqsha men mektep qurylysy bastaldy.
Batys Qazaqstan oblysynda 4 nysannyń aǵymdaǵy jóndeý jumystaryn 1 qyrkúıekke deıin aıaqtaý josparlanyp otyr. Soltústik Qazaqstan oblysynda sý basqan 5 bilim uıymynyń 3-eýi oqý jylyn bastaýǵa daıyn. Aqmola jáne Qostanaı oblystaryndaǵy bilim mekemelerinde jóndeý jumystary aıaqtalýǵa jaqyn. Atalǵan óńirlerde 6 nysan zaqymdanǵan, solardyń bireýi buzylyp, ornyna jańa ǵımarat salynady.
О́ńirlerde 8 medısına mekemesi zardap shekti. Úsh nysannyń qurylysy «Aýylda densaýlyq saqtaýdy jańǵyrtý» baǵdarlamasy aıasynda júrgizilip jatyr. Taǵy úsh nysan aǵymdaǵy jáne kúrdeli jóndeýdi qajet etedi, al bireýiniń ornyna jańa ǵımarat salý josparlanǵan.
Búgingi tańda respýblıkalyq magıstraldardyń 102 ýchaskesinde jumys tolyǵymen aıaqtaldy. Gaz tasymaldaý ınfraqurylymy nysandary shtattyq rejimde jumys isteıdi.
О́nerkásip jáne qurylys mınıstrligine ákimdiktermen birlesip, barlyq jumys aıaqtalǵanǵa deıin qurylys nysandarynda úılestirý men baqylaýdy kúsheıtý tapsyryldy.