Qoǵamda saıaq ómir súretin, «erekshe» toptyń qatarynda sanalatyn erekshe armandary bar jandar ǵajaıypqa kóbirek senedi. Alaıda aq pen qarasy qatar órilgen ómirde ǵajaıyp kóp bolmasa da, kórkem shyǵarmalarda kezdesip jatady. Máselen, Denıel Kızdiń «Aljernonǵa arnalǵan gúl» (Flowers for Algernon) shyǵarmasyndaǵy Charlı de bir ǵajaıypqa sendi, armanyna qol sozdy. О́miri kúrt ózgerip, «ereksheliginen» aıyǵatyn sol bir sátti ańsady. Qarapaıym adamdardyń qataryna asyqty. Jýyrda «Mazmundama» baspasynan osy erekshe jannyń taǵdyry sýrettelgen kitap qazaq tilinde jaryq kórdi.
«Aljernonǵa arnalǵan gúl» – álemge aqyl-esi kem jigittiń kózimen qarap, onyń jan saraıyna úńiltetin tebireniske toly shyǵarma. Roman kúndelik túrinde jazylǵan. Shyǵarmadaǵy basty keıipkerlerdiń prototıpi avtordyń ómirinen alynǵan. Charlı Gordon degen 32 jastaǵy jigit aqyldy bolýdy armandaıdy. Janyna jalaý bolar dos izdep, jaqsylyqtan úmit úzbeıdi. Kúnderdiń kúni adamnyń aqyl-oıyn operasııanyń kómegimen damytýdy kózdegen bilikti dáriger-ǵalymdarǵa tap bolyp, ózine tájirıbe jasaýyna kónedi. Bastapqyda orfografııalyq, pýnktýasııalyq qateden aıaq alyp júre almaıtyn onyń jazbalary birte-birte saýatty bolyp, mazmuny da tereńdeı túsedi. Áıtse de «aqyldy bolsam, dosym da kóp bolady, ómirim gúldenedi» dep kútken Charlıde bári kerisinshe bolady... Bir demmen oqylatyn shyǵarma janaryńa móldir monshaqtar tizip, janyńdy muńǵa bóleıdi.
Iá, bul kitaptyń qazaqshaǵa aýdarylyp shyǵýy da ońaıǵa soqpaǵan. Basty keıipkeri Charlıdiń taǵdyry sekildi bul shyǵarmanyń da joly aýyr bolypty. Baspa ókilderi úsh jyl degende avtor quqyǵyn áreń alǵan. Aýdarma jumystary da biraz ýaqytty alypty. Sonymen atalǵan baspanyń bes jyl boıǵy eńbeginiń arqasynda Denıel Kızdiń «Aljernonǵa arnalǵan gúli» qazaq oqyrmandaryna jol tartyp otyr. Aýdarǵan – aqyn Dáýren Berikqajyuly. «Bul aýdarma basqa aýdarma kitaptaryna qaraǵanda tym aýyr boldy. О́ıtkeni kitap aqyl-esi kem balanyń kúndelik ispetti baıandamasy arqyly berilgen. Orfografııa, pýnktýasııa zańdylyqtaryn bilmeıtin bala sózdi qalaı estise, solaı jazýǵa daǵdylanǵandyqtan, alǵashqy taraýlardy oqý oqyrmandarǵa qıyn soǵatyny belgili. Shyǵarma aqyl-esi kem balalardyń mehnatty taǵdyryna qoǵamnyń nazaryn aýdarý maqsatynda jazylǵan. Amerıkada budan 50-60 jyl buryn jaryq kórgen kitaptyń áli kúnge deıin ózektiligi artpasa, kemimegendigi kóp jaıttan habar berse kerek», deıdi aýdarmashy.
Aıta keteıik, kitap Allur avtokólik kompanııasynyń qarjylandyrýymen qazaq tiline aýdarylyp, basylyp otyr. Atalǵan kompanııa 1 000 dana kitapqa 5,5 mln teńge bólgen. Endi jańa shyǵarma Almaty oblysynyń mektep kitaphanalaryna taratylady.