Elimizde sýısıdten bolatyn ólim-jitim sany azdap tómendegen. Bas prokýratýranyń Quqyqtyq statıstıka jáne arnaıy esepke alý jónindegi komıtetiniń málimeti boıynsha, osy jyldyń qańtar-shilde aılarynda elde aıaqtalǵan sýısıd oqıǵalarynyń sany 2,1 myńǵa jýyqtap, 2023 jyldyń sáıkes kezeńimen salystyrǵanda 7,2%-ǵa azaıdy, dep habarlaıdy Egemen.kz Ranking.kz-ke silteme jasap.
Anyqtalǵandaı, óz-ózine qol jumsaýǵa bel býǵandardyń negizgi bóligi – 30 jastan asqan adamdar. Olardyń kópshiligi (81,5%) qaraly kúni ishimdik ishpegen jáne esirtki qoldanbaǵan. Al, salystyrmaly túrde balalardyń sýısıd jasaýy az tirkelgen, atap aıtqanda, 112 jaǵdaı.
Dese de, elde sońǵy birneshe jyldaǵy sýısıdten bolatyn ólim-jitimniń statıstıkasy jalpy joǵary deńgeıde. Sondaı-aq ekonomıkalyq damyǵan eldermen salystyrǵanda aıtarlyqtaı joǵary ekeni atap ótildi.
Statıstıka kórsetkendeı, Qazaqstanda sýısıd kóbinese eresek er adamdar arasynda kezdesedi eken. Mysaly, bıylǵy jyldyń qańtar-shilde aılarynda aıaqtalǵan sýısıdterdiń 74,9%-y eresek er adamdar arasynda bolǵan. О́z-ózine qol jumsaýdyń sebebin sarapshylar depressııa men basqa da psıhıkalyq densaýlyq problemalarynyń negizi dep sanaıdy.
Aıta keteıik, Qazaqstanda sýısıdti tergeý qylmystyq quram turǵysynan júrgiziledi. Ishki ister mınıstrliginiń qyzmetkerleri qylmystyq quqyq buzýshylyq – ózin-ózi óltirýge ıtermeleý belgileri bolsa, is qozǵaıdy. 2024 jyldyń jeti aıynda óz-ózine qol jumsaýǵa árekettengen nemese aıaqtalǵan 4,5 myń oqıǵanyń 852-si ǵana qylmystyq ispen aıaqtalǵan.