Saýda jáne ıntegrasııa mınıstri Arman Shaqqalıevtiń tóraǵalyǵymen mınıstrlik alańynda Tehnıkalyq retteý jáne metrologııa máseleleri jónindegi komıssııanyń kezekti otyrysy ótti. Onda ulttyq tehnıkalyq reglamentterdi, EAEO tehnıkalyq reglamentteriniń ótpeli erejelerin ázirleýge, sondaı-aq memlekettik organdardyń vedomstvoaralyq ózara is-qımylyna qatysty negizgi máseleler talqylandy, dep habarlaıdy Egemen.kz mınıstrliktiń baspasóz qyzmetine silteme jasap.
Tehnıkalyq retteý jáne metrologııa komıtetiniń tóraıymy Janna Esenbekovanyń aıtýynsha, elimizde KO/EAEO tehreglamentterimen qamtylmaǵan ónimderge qatysty 18 ulttyq tehnıkalyq reglament jumys isteıdi. О́tken jyly ǵımarattar men qurylys materıaldarynyń qaýipsizdigin retteıtin eki qujat, sondaı-aq ósimdikterdi qorǵaý quraldary qabyldanǵan. Sonymen qatar salalyq ýákiletti organdar alkogol ónimderi, joǵary voltty jabdyqtar men kómir boıynsha ulttyq tehnıkalyq reglamentterdi ázirleý aıaqtalǵanyn habarlady. Sondaı-aq Týrızm jáne sport mınıstrligi sporttyq jabdyqtar men túgendeýge qatysty jańa reglament ázirleýdi bastaǵany belgili boldy.
Komıssııa otyrysynda paıdalaný merzimi ótken lıftilerdi aýystyrý qajettigi de aıtyldy. Aıta keteıik, 2025 jyldyń 15 aqpanyna deıin EAEO-ǵa múshe memleketter eger pasportta qyzmet etý merzimi týraly aqparat bolmasa, 25 jyldan astam paıdalanylatyn lıftilerdi aýystyrýy tıis. Bul talaptar 2013 jylǵy 15 aqpanda kúshine engen KO TR 011/2011 «Lıftilerdiń qaýipsizdigi» tehnıkalyq reglamentinde bekitilgen.
О́nerkásip jáne qurylys mınıstrliginiń aqparaty boıynsha, búgingi tańda jergilikti atqarýshy organdar lıftilerdi aýystyrý boıynsha jumystar júrgizip jatyr. Bıylǵy jyly 224 lıftini, al kelesi jyly 300-den astamyn aýystyrý josparlanǵan.
- «Lıft qaýipsizdigi» KO tehnıkalyq reglamentiniń normalaryn ýaqtyly qamtamasyz etý úshin jergilikti atqarýshy organdar jáne TJM aýmaqtyq departamentterimen birlesip tehnıkalyq retteý jónindegi óńirlik shtabtar sheńberinde iske asyrylatyn naqtylanǵan jospar-kesteni ázirleý týraly sheshim qabyldandy. Jospar lıftilerdi paıdalaný boıynsha normatıvtik qyzmet merziminen asatyn merzimder men talaptardy naqty kórsetýi tıis, - delingen mınıstrlik habarlamasynda.
Komıssııa sondaı-aq Ahýaldyq shtab jumysy sheńberinde azyq-túlik jáne ónerkásip taýarlaryna memlekettik baqylaý qorytyndylaryn qaraǵan.
- 2024 jyldyń 7 aıynyń qorytyndysy boıynsha shekara mańyndaǵy segiz ótkizý pýnktinde 14 776 avtokólik pen 164 613 tonna sút jáne sút ónimderi tekserildi. Kúsheıtilgen baqylaýdyń nátıjesinde 242 kólik quraly qaıtaryldy. EAEO-nyń 27 óndirýshisine qatysty «kúsheıtilgen zerthanalyq baqylaýdyń» 29 rejımi engizildi. Qazirgi ýaqytta 12 sút ónimderin shyǵarýshylarǵa qatysty baqylaý kúsheıtilgen. Kólik quraldaryna qatysty 1301 birlesken tekserý júrgizildi, onyń ishinde 74-i talaptarǵa sáıkes kelmedi. Akkredıttelgen zerthanalarǵa jospardan tys tekserister júrgizilip, 12 mıllıon teńge somasyna aıyppul salyndy jáne 8 zerthananyń akkredıtteý attestattary toqtatyldy. Akkredıtteý jónindegi organ 11 zerthananyń akkredıtteý attestattaryn keri qaıtaryp aldy. Eýrazııalyq ekonomıkalyq odaqtyń sáıkestikti baǵalaý jónindegi organdardyń biryńǵaı tiziliminen 3 zerthana alynyp tastaldy, - delingen habarlamada.
Arman Shaqqalıev memlekettik organdar arasyndaǵy ózara is-qımyldy odan ári úılestirýdiń jáne ónim qaýipsizdigin baqylaýdy kúsheıtýdiń mańyzdylyǵyn atap ótti. Bul sharalar Qazaqstan Respýblıkasynyń aýmaǵynda da, jalpy EAEO sheńberinde de taýarlardyń sapasy men qaýipsizdigin arttyrýǵa baǵyttalǵan.