«Samuryq-Qazyna» aksıonerlik qoǵamy seriktesterimen birigip Oral qalasynyń jastaryna arnalǵan kreatıvti hab quryp jatyr.
Qor basshysy Nurlan Jaqypov Batys Qazaqstan oblysyna issapary aıasynda atalǵan oblys ákimi Narıman Tóreǵalıevpen birge Oraldaǵy «OzgeEpic Oral» kreatıvti habynyń jóndeý jumystarymen jáne qurylys qarqynymen tanysty. Joba Qordyń biryńǵaı qaıyrymdylyq operatory «Samruk-Kazyna Trust» qorynyń qarjylandyrýymen júzege asyp jatyr.
– Memleket basshysy aımaqtarda shyǵarmashylyq ındýstrııa ortalyqtaryn ashýdy tapsyrǵan edi. Bul bastama óńirdegi talantty jastardyń áleýetin ashýǵa múmkindik beredi. Sonymen qatar kreatıvti habtar aımaq ekonomıkasynyń damýyna serpin ákeledi. Byltyr Aqtóbe oblysyndaǵy kitaphana ǵımaratyn ǵylym men kreatıv ortalyǵyna aınaldyrǵan edik. Bıyl Oral qalasynda kreatıv habyn salý jumystaryn bastap kettik. Dál osyndaı ortalyq Soltústik Qazaqstan oblysynda da ashylady, – dedi qor basshysy N.Jaqypov.
Ortalyq jastardyń qosymsha bilim alyp, shyǵarmashylyq qabiletin damytýyna múmkindikter týǵyzbaq. Habta zamanaýı qazaq óneri men ınnovasııalyq kórkemdik sheshimderdi damytý, sondaı-aq Qazaqstan men halyqaralyq qaýymdastyqtar sheńberinde art-jobalar ázirleý josparlanyp otyr. Rezıdentter qataryna 14 pen 35 jas aralyǵyndaǵy shyǵarmashylyq ındýstrııada jumys isteıtin jastar, sonyń ishinde NEET sanatyndaǵy jastar men erekshe qajettilikteri bar jandar men stýdentter kiredi.
Jańa kreatıvti habta jastar spektaklder men túrli sheberlik sabaqtaryna, anımasııa men dýblıaj jasaýǵa erkin qatysa alady. Sonymen qatar suranysqa ıe baǵyttar boıynsha 200 adam jańa mamandyqtardy ıgeredi.
Jańa shyǵarmashylyq habtyń ashylýy kelesi jyldyń sońyna josparlanǵan.
«Samruk-Kazyna Trust» KQ baspasóz ortalyǵy