Úkimette vıse-premer Serik Jumanǵarınniń tóraǵalyǵymen kúzgi dala jumystary máseleleri jónindegi jedel shtabtyń birinshi otyrysy ótti. Shtab úzdiksiz egin jınaý naýqanyna kedergi keltiretin taktıkalyq máselelerdi dereý sheshý maqsatynda qurylǵan, dep habarlaıdy Egemen.kz.
Aıta keteıik, jaqyn arada Aýyl sharýashylyǵy mınıstrligi men «Azyq-túlik korporasııasy» AQ ókilderi jergilikti jerlerde egin jınaý jumystaryn jedel basqarý úshin óńirlerge barady.
«20 tamyzdaǵy jedel derekterge sáıkes, elimizde 2,2 mln tonna astyq bastyrylyp, 1,1 mln tonnasy jınaldy. Ondaǵy daqyldardyń 76%-y jaqsy, 22%-y qanaǵattanarlyq dep baǵalanyp otyr. Egin jınaý qarqyny byltyrǵy jylmen sáıkes deýge bolady, biraq tolassyz jaýǵan jańbyr jappaı jumys isteýge jáne dándi daqyldardyń tolyq pisýine kedergi keltirip jatyr», dep habarlady mınıstrliktiń baspasóz qyzmeti.
Aýyl sharýashylyǵy vıse-mınıstri Azat Sultanovtyń aıtýynsha, búginde negizgi astyq egetin óńirlerde táýligine jalpy qýaty 820,6 myń tonna bolatyn 1301 astyq keptirý agregaty bar. Osy keptirý agregattarynyń jumysy úshin 61 myń tonna arzandatylǵan dızel otynyna ótinimder kelip túsken. Biraq keıbir oblystarda keptirgishter suıytylǵan gazben jumys isteıdi, sondyqtan bul qondyrǵylarǵa arzandatylǵan gaz qajet ekeni atap ótildi.
Bul rette Premer-mınıstrdiń orynbasary S. Jumanǵarın AShM men EM-ge keptirý agregattary úshin qajetti suıytylǵan gaz kólemin eseptep, fermerlerdi arzandatylǵan otynǵa kezekte turǵandar tizimine qosýdy tapsyrdy. Sondaı-aq ákimdikterge fermerlerdiń mobıldi keptirý agregattaryna degen qajettiligin esepteý, al qarjy ınstıtýttaryna atalǵan qurylǵylardy satyp alýdy sýbsıdııalaý múmkindigin pysyqtaý tapsyryldy.