Senat depýtaty Sergeı Karplıýk Rýdnyı qalasyna baryp, shahardyń jylý maýsymyna daıyndyq barysymen tanysty. Bıyl munda jylý jelilerindegi jumys kólemi aıtarlyqtaı artqan. Jańartylǵan magıstraldyq jelilerdiń uzyndyǵy 18 km-di quraıdy. Bul ótken jylmen salystyrǵanda 5 km-ge artyq.
Atqarylǵan jumystyń nátıjesinde keıingi eki jylda magıstraldyq jylý jelileriniń tozý deńgeıi 31 paıyzǵa, al toqsandyq jelilerdiń tozý deńgeıi 66 paıyzǵa deıin tómendedi. Sapar aıasynda depýtat salynyp jatqan eki sport kesheni men 900 jáne 1 200 oryndyq mektepterdiń qurylys alańyna bardy. Sondaı-aq turǵyn úılerdi qalpyna keltirý baǵytyndaǵy jumystarmen de tanysty.
Sonymen qatar senator Áýlıekól aýdanynyń turǵyndarymen jáne aýdandyq máslıhat depýtattarymen kezdesti. Is-shara barysynda aýdan ınfraqurylymyn damytý, memlekettik satyp alý máseleleri, aýyl sharýashylyǵyn sýbsıdııalaý, salyq salý, shaǵyn jáne orta bıznesti qoldaý jáne halyqty tegin medısınalyq kómekpen qamtamasyz etý máseleleri talqylandy.
«Saparymyzdyń basty maqsaty – óńirlerdegi ózekti problemalardy kózimizben kórip, olardy jergilikti turǵyndarmen ashyq talqylap, sheshý joldaryn qarastyrý. Barlyq máseleni depýtattyq qyzmette eskeremiz. Qajet bolǵan jaǵdaıda zańnamaǵa ózgerister engizilýi de múmkin. Eń bastysy, bul úderiste ár turǵynnyń pikirin eskerý mańyzdy», dedi Sergeı Kaplıýk.
Sondaı-aq depýtat mektepti qaıta qalpyna keltirý jumystarynyń jaı-kúıine nazar aýdardy. Odan bólek, Amanqaraǵaı aýylyndaǵy aýyldyq mádenıet úıi men balalar jazǵy lagerine jáne Áýlıekól aýylyndaǵy jańa balabaqshaǵa bardy.
Senatordyń Qostanaı oblystyq máslıhatynyń depýtattarymen kezdesýinde aýyl sharýashylyǵyn sýbsıdııalaý jáne kólik ınfraqurylymyn jetildirý máseleleri talqylandy. Al oblystyq badmınton federasııasynyń ókilderimen júzdesýde sala mamandary sportshylardy daıarlaý sapasy men sport zaldaryn materıaldyq-tehnıkalyq jabdyqtaý baǵytyndaǵy basymdyqtarǵa toqtaldy.