Ekinshi dúnıejúzilik soǵystan aman oralyp, oblystyq, keıinnen respýblıkalyq prokýratýrada jemisti eńbek etken belgili qoǵam qaıratkeri, akademık Salyq Zımanov osy salada doktorlyq dıssertasııa qorǵaǵan alǵashqy zańgerdiń biri. Zań ǵylymynyń damýyna laıyqty úlesin qosqan zańǵar zańger shákirt te tárbıeledi, táýelsiz Qazaqstannyń memlekettiligin qalyptastyrýǵa da eleýli eńbek etti. Zańǵar zańgerdiń ǵalymdyq, azamattyq ómir joly barshany qyzyqtyrady. Ǵıbratty ǵumyr keshken ǵalymnyń salıqaly oı-tolǵamdary, tulǵa retindegi qalyptasý kezeńi «Salyk Zımanov. Materıaly ı bıblıografıı» jáne «Ǵylymdaǵy ǵasyr abyzy, akademık Salyq Zımanov» atty zertteý kitaptaryna arqaý bolǵan. Bul kitaptarda zańǵar zańgerdiń hattary, usynys-pikirleri toptastyrylǵan. Sonymen birge, «Salyq Zımanov ómirinen bir kún» degen bólimde onyń egemen el deklarasııasyna qatysty áńgimeleri, qazaq tiliniń búgingi qoldanysy men bolashaǵy haqyndaǵy oılary oqyrman qyzyǵýshylyǵyn týdyrady.
Kitaptardyń jaryq kórýine yqpal etken Parlament Senatynyń depýtaty Sársenbaı Eńsegenov «Salyq aǵamyzdyń: «Elbasy meniń sózimdi qýattap, ornynan on bir ret kóterildi» degen sózin tebirenispen oqydym» degen pikirimen bólisti. Aıtqandaı, qos kitaptyń avtory –tarıh ǵylymdarynyń doktory, professor Ilııas Qozybaev. Tarıhshy ǵalymnyń akademık týraly zertteý kitaptaryn senator Sársenbaı Eńsegenov Ǵ.Slanov atyndaǵy oblystyq ǵylymı ámbebap kitaphanaǵa jáne Salyq Zımanov bilim alǵan Jambyl atyndaǵy №21 orta mekteptiń kitaphanasyna tapsyrdy.
Joldasbek ShО́PEǴUL,
«Egemen Qazaqstan».
Atyraý oblysy.
Sýretti túsirgen
Rahym QOILYBAEV.