Parlament Senatynyń depýtaty Álibek Náýtıev Atyraý oblysynyń Isataı, Qurmanǵazy aýdandarynda bolyp, aýdandyq máslıhat depýtattarymen jáne qoǵamdyq keńes múshelerimen kezdesti.
Kezdesýde azamattardy alańdatqan ózekti máseleler, sonyń ishinde kásipkerler úshin belgilengen salyq mólsheri, jaıylymdyq jerler, nysandar qurylysyndaǵy kidirister jáne joldyń sapasyna qatysty problemalar talqylandy. Senator kóterilgen máselelerdi jedel sheshý qajet ekenin jáne bul túıtkilder depýtattyq qyzmette nazardan tys qalmaıtynyn atap ótti.
Sonymen qatar depýtat Senattyń zań shyǵarý qyzmeti týraly aıtyp, qoǵamnyń damýyna eleýli yqpal etetin jáne áleýmettik-ekonomıkalyq salaǵa oń ózgeris ákeletin negizgi zańdarǵa toqtaldy.
Álibek Náýtıev Isataı aýdanynyń Toman aýylyndaǵy elektrmen jabdyqtaý jelisiniń, medısınalyq pýnkttiń qyzmetimen de tanysty. Sondaı-aq Qurmanǵazy eldi mekenindegi ońaltý ortalyǵynyń, «Atyraý – Astrahan» tas joly qurylysynyń jaı-kúıine nazar aýdardy.