Qyrǵyz eliniń kásipkerleri Atyraý óńiriniń ekonomıkasyna ınvestısııa salýǵa nıet bildirip otyr. Bul másele oblys ákimi Serik Shápkenov pen Qyrǵyz Respýblıkasynyń Qazaqstandaǵy Tótenshe jáne ókiletti elshisi Dastan Dıýshekeevtiń kezdesýinde talqyǵa tústi.
Ákimdik málimetinshe, bıyl 6 aıda Atyraý oblysy men Qyrǵyzstannyń syrtqy saýda aınalymy 3,2 mln dollardy quraǵan. Buǵan eki eldiń arasyndaǵy mádenı-gýmanıtarlyq, týrızm jáne sport salalaryndaǵy yntymaqtastyq oń áserin tıgizgen. Sol sebepti iskerlik qarym-qatynasty jetildirýge qatysty barlyq usynys qoldaý tabady.
«Ejelden kórshiles otyrǵan eki el arasynda táýelsizdik alǵan kezeńnen beri baýyrlastyq qarym-qatynas pen saýda-ekonomıkalyq baılanys nyǵaıa tústi. Qazir Atyraý oblysynda qyrǵyz kapıtaly salynǵan 20 kásiporyn bar. Bul kásiporyndar qyzmet kórsetý, oıyn-saýyq, kóterme saýda jáne basqa salalarda qyzmet kórsetedi. Biz óz tarapymyzdan ekijaqty saýda-ekonomıkalyq yntymaqtastyqty odan ári keńeıtýge, qyrǵyz ınvestısııasyn tartýǵa, birlesken kásiporyndar qurýǵa qyzyǵýshylyq tanytyp otyrmyz. Qyrǵyzstan men Atyraý oblysynyń kásipkerleri birlesken jobalardy iske asyrsa, elderimiz arasyndaǵy halyqaralyq yntymaqtastyq pen ózara tıimdi áriptestiktiń nyǵaıýyna tyń serpin berer edi», deıdi S.Shápkenov.
Qyrǵyzstan elshisi Dastan Dıýshekeevtiń aıtýyna qaraǵanda, baýyrlas elderdiń halyqaralyq sıpattaǵy túıindi máselelerge qatysty ortaq ustanymy bar. Ár kez bir-birine qoldaý bildirip, alys-beris pen barys-kelisti jetildirýge eshqandaı kedergi jasaǵan emes.
«Eki eldiń ejelden kórshilik haqy buzylmaı, yntymaǵy jarasyp keledi. Qazir sol yntymaqtastyqty odan ári nyǵaıtýdyń múmkindigi zor. Elaralyq yntymaqtastyqtyń nátıjesinde saýda-sattyqty jetildire túsýge bolady. Ekonomıkaǵa ınvestısııa tartýǵa qolbaılaý bolatyndaı másele týyndaǵan emes. Kópjyldyq baılanys nátıje berdi. Endi tranzıt, kólik jáne týrızm salalaryndaǵy qatynastardy damytýdyń keleshegi bar», deıdi D.Dıýshekeev.
Elshiniń aıtýynsha, Qyrǵyzstan tarapynan Atyraý oblysymen taý-ken jáne jeńil ónerkásip, aýyl sharýashylyǵy, týrızm salalaryna qyzyǵýshylyq basym bolyp otyr. Osyǵan oraı aıyr qalpaqty kásipkerler munaıly óńirdegi áriptesterimen iskerlik baılanys ornatqysy keledi. Ystyqkól jaǵalaýyndaǵy toqyma ónerkásibiniń ókilderi de qyzyǵýshylyq tanytyp otyr.
«Qazaqstannan jyl saıyn Qyrǵyzstanǵa 1 mıllıonnan astam týrıst saıahattaýǵa, demalýǵa barady. Keıingi kezde Qazaq eliniń ońtústigindegi oblystarmen yntymaqtastyq jolǵa qoıyldy. Endi batys óńirdegi naryqqa qadam jasaǵymyz keledi. Máselen, ekijaqty reısterdi ashý jospary bar. Jolaýshylar sany 60 paıyzdan asatyn bolsa, áýe kompanııalary tikeleı reısterdi ashýǵa daıyn», deıdi D.Dıýshekeev.
Onyń dereginshe, Qyrǵyzstannan aýyl sharýashylyǵy ónimderin Atyraý oblysynyń naryǵyna ákelýge ynta tanytyp otyrǵandar bar. Osyǵan baılanysty jergilikti turǵyndar jıi tutynatyn ári áleýmettik mańyzy bar azyq-túlik jáne ózge taýarlardyń baǵasy zerdelenbek. Árıne, logıstıka salasyndaǵy azdaǵan túıtkil oń sheshimin tapsa, eki el Úkimetine usynys jasalýy múmkin.
Atyraý oblysy