Nura aýdanynyń prokýratýrasy tekserý barysynda erikti qonys aýdarý baǵdarlamasy boıynsha bólingen qarjynyń jumsalýyndaǵy zań buzýshylyqtardy anyqtady, dep habarlaıdy Egemen.kz.
Anyqtalǵandaı, zań buzýshy turǵyn úı satyp alýǵa arnalǵan qarajatty basqa maqsatta jumsaǵan. Atap aıtqanda, 2023 jyly Astanadan Nura aýdanyna kóship kelgen azamat O.Kósherbaı satyp alǵan úıine qonystanbaǵan. Ony kóshirýge 966 000 teńge jáne turǵyn úı satyp alýyna — 4 000 000 teńge bólingen.
«2023 jyldyń qarasha aıynda ol 8 300 000 teńgege páter satyp alý-satý shartyn bekitken. Alaıda, tekserý barysynda atalǵan úıde burynǵy ıesi men onyń otbasy turyp jatqany anyqtaldy», delingen habarlamada.
Prokýratýra qabyldaǵan sharalardyń nátıjesinde О́.Kósherbaı memlekettik bıýdjetke 2 000 000 teńgeni qaıtarǵan. Al qalǵan somaǵa sotqa talap-aryz berilgeni belgili boldy.