Memleket ekonomıkadaǵy jeke sektor úlesin arttyrý baǵytyna qaraı belsendi oıysyp kele jatyr. Keıingi jyldary, ásirese shaǵyn jáne orta bıznesti qoldaý keshendi túrde iske asyryla bastady. Shaǵyn jáne orta kásippen aınalysatyn kásipkerlerdiń qarjylyq resýrstarǵa qol jetkizýine, bıznesiniń turaqtylyǵyn qamtamasyz etýine jaǵdaı jasaý dál qazir memlekettiń basty mindetine aınalǵan.
Kásipkerlerdi qoldaý sharalary san qıly. Qarjylandyrý tetikteriniń qatarynda sýbsıdııa, grant, jeńildetilgen nesıe men salyq jeńildikteri eskerilgen. Osy múmkindikterdi paıdalana otyryp, kásip ıeleri jańadan jabdyqtar satyp alady, óndiristi keńeıtedi, qyzmetkerler biliktiligin arttyryp, bıznestiń damýy men ósýine yqpal etetin túrli maqsatqa moıyn burady.
«Atameken» UKP basqarma tóraǵasynyń orynbasary Murat Ámrınniń aıtýynsha, keıingi jeti aıda shaǵyn bıznes salasynda 2 mln 25 000 kompanııa jumys istep, aldyńǵy jyldarmen salystyrǵanda 10%-ǵa ósken.
«Al orta kásipkerlik segmentinde shamamen 3 000-ǵa jýyq kompanııa bar. Olardyń ósý deńgeıi óte tómen, 0,5%-dy áreń quraıdy. Memleket basshysy orta bıznestiń turaqty damýyna qatysty naqty tapsyrma berdi. Biz shaǵyn bıznestiń orta bızneske ótýine, al orta bıznes sanynyń odan ári arta túsýine múddeli bolýymyz kerek», deıdi.
Sarapshylar shaǵyn bıznestiń orta bızneske aýysýǵa asyqpaıtynyn, al orta bıznestiń jasandy túrde usaq fırmalarǵa bólshektený úrdisi bar ekenin aıtady. Onyń tórkinin mamandar zańnamadaǵy turaqsyzdyq pen salyqqa qatysty ózgeristerden izdeıdi.
«Qazir jańa Salyq kodeksi ázirlenip jatyr. Mólsherlemege qatysty naqty usynystar bar. Májilistiń jumys toby iske kirisip, orta bıznesti qoljetimdi quraldarmen qarjylandyrý máselesi qarastyrylyp jatyr. Bul qarjy shaǵyn bıznes úshin de qajet. Qarjylandyrý týraly sóz bolǵanda, álbette, memlekettik baǵdarlamalar alǵa tartylady. Taıaýda Úkimet shaǵyn jáne orta bıznesti qoldaý baǵytynda bıznestiń jol kartasy men qarapaıym zattar ekonomıkasyn biriktiretin keshendi sharalar baǵdarlamasyn qabyldady. Onda nesıege kepildik berý tetikteriniń qoldanylý aıasyn keńeıtý men memlekettik shyǵyndardy ońtaılandyrý máselesi qarastyrylǵan. Bıznesti qoldaýǵa qatysty memlekettik baǵdarlamalardyń búginde qanshalyqty tıimdi bolyp jatqanyn baǵalaý ári taldaý mańyzdy», deıdi «Atameken» ókili.