Elbasy Nursultan Nazarbaev Saýd Arabııasynyń Koroli Salman ben Ábdel Ázız Ál Saýdqa Qos kıeniń saqshysy, Korol Abdalla ben Ábdel Ázız Ál Saýdtyń qaıtys bolýyna baılanysty kóńil aıtý jedelhatyn joldady, – dep habarlady Prezıdenttiń baspasóz qyzmeti.
Jedelhatta saýd monarhynyń qaıtys bolǵany týraly habardy Memleket basshysynyń zor kúızelispen qabyldaǵany aıtylǵan.
Qazaqstan Prezıdenti Korol Abdallanyń óz ómirin Saýd Arabııasy halqynyń, búkil ıslam jamaǵatynyń múddesin qorǵaýǵa, adamzattyń ádildik pen izgilik jolyndaǵy damýyna arnaǵanyn atap ótken.
«Qazaqstan halqy Korol Abdallany parasatty basshy, bedeldi saıasatker, ekijaqty yntymaqtastyqty nyǵaıtýǵa orasan zor eńbek sińirgen tarıhı tulǵa retinde árdaıym esinde saqtaıtyn bolady», – delingen jedelhatta.
Nursultan Nazarbaev orny tolmas qaıǵyǵa ortaqtasa otyryp, Qazaqstan halqynyń jáne jeke óziniń atynan Salman ben Ábdel Ázız Ál Saýdqa jáne barsha Saýd Arabııasy halqyna kóńil aıtty.