ASTANA. 24 qańtar. Álemniń munaı rynogynda Saýd Arabııasy munaıynyń úles-salmaǵy burynǵydan da arta túsedi. Al korol Abdalla qaıtys bolǵannan keıin onyń taǵyna otyrǵan jańa korol Salman aldyńǵy bıleýshiniń tańdap alǵan baǵytynan taımaıdy. Bu týraly Brıtanııanyń Telegraph gazeti jazdy.
Saýdııanyń altynshy korli Abdalla Abdýl-Azız Al Saýd 23 qańtar kúni 91 jasynda qaıtys boldy. Onyń ornyn 79 jastaǵy inisi Salman basty.
Basylymnyń pikirinshe, buǵan deıin ınsýlt alyp qalǵan Salman «ýaqytsha» monarh bolyp tabylady. Onyń maqsaty aǵasynyń mıssııasyn abyroımen oryndap, eldiń Taıaý Shyǵystaǵy burynnan bar saıası jáne ekonomıkalyq kúshin nyǵaıta túsý bolmaq. Al munaı baǵasynyń arzan bola túsýi saýd bıleýshisi úshin taptyrmaıtyn baǵyt. Ol tek eldiń baǵyn asyra beredi. Osyǵan qaraǵanda, Saýd Arabııasy óziniń munaı rynogyndaǵy qarsylastaryn budan ary qysatyn bolady.
Telegraph gazetiniń OPEK-tegi mánbeleri Saýdııanyń bıylǵy jyly aldyna qoıyp otyrǵan mindeti kúnine qazirgi 9,2 mln. ornyna 10,5 mln. barrel óndirý deńgeıine jetkizý bolyp otyrǵanyn jetkizdi. Muny ol uıymnyń basqa músheleriniń kelisiminsiz jasaǵaly otyr.
«Rynok munaıǵa tolyp tur, al munaı-gaz kompanııalary óz jumystarynyń kólemin belsene qysqartyp jatyr. Saýd Arabııasynyń kútkeni de osy. Eldiń 750 mlrd. dollarǵa jýyq valıýtalyq rezervi bıylǵy jylǵy bıýdjet tapshylyǵyn jabý men memlekettik sýbsıdııany qarjylandyrýǵa molynan jetedi»., - dep jazady basylym.
Murat Aıtqoja.
Derek, sýret: Telegraph.