Senat Tóraǵasy Máýlen Áshimbaev Parlamenttiń jańa sessııasyndaǵy Palata bıýrosynyń alǵashqy otyrysyn ótkizdi. Onda depýtattar Memleket basshysy Joldaýda belgilep bergen mindetterden týyndaıtyn Senattyń jumys josparyn talqylady jáne 5 qyrkúıekte ótetin Palata otyrysynyń kún tártibin bekitti.
Máýlen Áshimbaev el Prezıdenti Qasym-Jomart Toqaevtyń Qazaqstannyń saıası jáne áleýmettik-ekonomıkalyq damý keleshegine qatysty tapsyrmalaryna nazar aýdaryp, Palatanyń aldaǵy jumysynyń jekelegen baǵyttaryna toqtalyp ótti.
«Prezıdentimiz Qasym-Jomart Kemeluly Toqaev VIII saılanǵan Parlamenttiń úshinshi sessııasynyń ashylýynda Qazaqstan halqyna Joldaýyn jarııalap, aldaǵy maqsat-mindetterdi belgilep berdi. Sondaı-aq Joldaýda elimizdiń saıası jáne áleýmettik-ekonomıkalyq damý perspektıvalaryna qatysty máseleler aıqyndaldy. Senat Memleket basshysy júktegen barlyq mindetti iske asyrýǵa jan-jaqty qoldaý kórsetedi. Bul rette qajetti zańdardyń ýaqtyly ázirlenýi men qabyldanýyn qamtamasyz etý – basty mindet. Osyǵan oraı Joldaýda kóterilgen máseleler men tapsyrmalardy eskere otyryp, Senattyń aldaǵy negizgi is-sharalar josparyn pysyqtaý qajet», dedi Senat tóraǵasy.
Sonymen qatar Palata spıkeri strategııalyq baǵyttar boıynsha qolǵa alynatyn sharalar toptamasyna nazar aýdardy. Atap aıtqanda, Memleket basshysy atap ótken elimizdegi ınvestısııalyq jáne bıznes-ahýaldy jaqsartý, agroónerkásiptik keshenge ınvestısııa tartý, aqsha-nesıe jáne fıskaldyq saıasatty jańǵyrtý sııaqty mindetter týraly sóz boldy.
«Salyq júıesin qaıta qaraý jáne ony jappaı sıfrlandyrý kózdelip otyr. Jańa Salyq kodeksin sapaly ázirleý úshin ony qabyldaý merzimi kelesi jylǵa aýystyryldy. Sondaı-aq aýdan jáne oblystyq mańyzy bar qalalardyń ákimderin tikeleı saılaý, bankter jáne quqyq buzýshylyqtardyń aldyn alý týraly jańa zańdar qabyldaý júktelgen mindetterdi iske asyrý jolyndaǵy mańyzdy qadam bolary anyq. Buqaralyq sportty damytý, áleýmettik saıasat jáne aktıvterdi qaıtarý baǵytyndaǵy zańdar da qabyldanady. Osy oraıda Senat Memleket basshysy belgilep bergen barlyq bastamanyń iske asyrylýyn zańnamalyq turǵydan qamtamasyz etedi», dedi Máýlen Áshimbaev.
Aldaǵy beısenbide bolatyn Palata otyrysynda senatorlar «Qazaqstan Respýblıkasynyń Úkimeti men Qyrǵyz Respýblıkasynyń Mınıstrler Kabıneti arasyndaǵy «Qarasý» jáne «Aq-Tilek» avtojol ótkizý pýnktteri aýdanynda ındýstrııalyq saýda-logıstıkalyq keshendi qurý jáne onyń qyzmetin retteý týraly kelisimdi ratıfıkasııalaý týraly» zańdy qaraıdy.