ASTANA. 24 qańtar. Basketboldan VTB biryńǵaı lıgasynyń 17-týr aıasynda elordalyq «Astana» óz alańynda reseılik «Enıseıdi» qabyldap, 86:95 esebimen ese jiberdi. Bul týraly bcastana.kz habarlady.
Oıyn salǵan jerden qonaqtardyń basymdyǵymen bastaldy. Esepti ashqan da «Enıseı» basketbolshylary. Qazaqstandyq komanda qansha shabýyldaǵanymen qarsylastar qorǵanysta syr aldyrmady. Nátıjesinde, alǵashqy shırek «Enıseıdiń» basymdyǵymen aıaqtaldy. Esep 19:24.
Ekinshi shırekte alań qojaıyndary qonaqtar sapyndaǵy qos amerıkalyq legıoner Donell Kýper men Terrıko Ýaıtqa erekshe kóńil bólip, jeke baqylaýǵa aldy. Sebebi, alǵashqy kezeńde komandanyń negizgi úılestirýshileri osy eki oıynshy bolǵan edi. Degenmen, Aleksandr Trıfýnovıchtiń shákirtteri bul áreketten aıtarlyqtaı nátıje shyǵara almady. Esesine, attary atalǵan qos oıynshy bizdiń basketbolshylardy qapy qaldyryp, komandasynyń upaı sanyn molaıta berdi. Tek úlken úziliske sanaýly mınýttar qalǵan kezde astanalyqtar óz oıyn órnegin taýyp, kezeńdi 43:40 esebimen óz paıdalaryna aıaqtady.
Kelesi kezeńde qonaqtardyń basymdyǵy aıqyn sezildi. Ásirese, Kýper, Ýaıt, Kıkanovıch jáne Leshıch tórttigi tamasha úndestik taýyp, birneshe mańyzdy upaıdy qorjyndaryna saldy. О́z kezeginde, bizdiń komandaǵa sońǵy sheshýshi kezeńge úmit artýdan basqa amal qalmady. Sebebi, bul kezeńde «Enıseı» 58:71 esebimen uzap ketken edi.
О́kinishke qaraı, tórtinshi shırekte de oıyndaǵy jaǵdaı ózgerissiz qalyp, tóreshi ysqyryǵy estilgen sátte tabloda «Enıseıdiń» paıdasyna 86:95 esebi kórsetilip turdy.
Oıynnyń basty qaharmany retinde «Enıseı» sapyndaǵy D.Kýper tanyldy. Ol osy oıynda 13 upaı jınap qana qoımaı, 23 nátıjeli pas shyǵardy. Al bul VTB lıgasynyń jańa rekordy. Osylaısha, «Saryarqa» velotreginde lıganyń kezekti rekordy tirkeldi.
Oıyn barysynda eń kóp upaı jıǵan oıynshy da Krasnoıarskiden kelgen komandada oınaıdy. Kýperdiń otandasy T.Ýaıt bul kezdesýde 33 upaı jıǵan. «Astana» sapynan eń mergen oıynshy esebinde Nık Kaner-Medlıdiń esimi ataldy. Onyń enshisinde 31 upaı.
Aıta keter jaıt, alǵashqy aınalymda qos komanda arasyndaǵy oıyn «Astananyń» jeńisimen aıaqtalǵan bolatyn. «Enıseıdiń» alańynda ótken sol tartysta bizdiń komanda 81:83 esebimen jeńiske jetken edi. Sol kezde ketken eseni reseılik komanda bul joly artyǵymen qaıtardy.
Lıga aıasynda ótkizgen sońǵy bes oıynnyń tórteýinde jeńilgen astanalyqtar týrnır kestesinde 8-satyda tur. Jarystyń pleı-off kezeńine alǵashqy 8 komanda ótetiniń eskersek, bul nátıje janǵa demeý. Degenmen, 9-orynda kele jatqan latvııalyq «VEF» komandasynyń da upaı kórsetkishteri bizben birdeı. Sondyqtan «Astanaǵa» qalǵan oıyndarda bosańdyq tanytpaı, shıraq qımyldaý lázim. Al «Enıseı» Astanadan qajet upaıdy alǵanyna qaramastan, búginde 13-orynda keledi.
Elordalyq ujym kelesi oıyndy da óz alańynda ótkizedi. 1 aqpan kúni bolatyn atalmysh kezdesýde Astanaǵa týrnır kestesiniń 14-satysynda turǵan Chehııanyń «Nımbýrk» komandasy qonaqqa keledi.
Elaman Qońyr.
Derek, sýret: bcastana.kz.