Ortalyq mýzeıdiń arheologııa bóliminiń mamandary Túrkistan oblysy Sozaq aýdanyndaǵy Qyzylkól aýyly mańynda ornalasqan arheologııalyq eskertkishtegi dalalyq zertteý jumysyn aıaqtady. Nátıjesinde, qańly mádenıetine qatysty bizdiń zamanymyzdan buryn II ǵasyrǵa jatatyn biregeı artefaktiler tabyldy. Ǵalymdardyń pikirinshe, bul jerde ǵıbadathana men eki qorǵan ornalasqan.
Qazba jumystary kezinde iri qara jáne usaq maldyń súıekteri men múıizderi, dıirmen, keli jáne taǵy da basqa eńbek quraldarynyń bólikteri, qysh ydys tutqalary, kıimge arnalǵan túıme synyqtary alyndy. Sonymen qatar ǵıbadathananyń batys bóliginde ashylǵan bólmeniń ishinde 60 sm tereńdikte ǵuryptyq buıym ydysynyń kishkene bóligi saqtalǵan sılındr pishindi, tabany jaıpaq tuǵyr tabyldy.
Arheologterdiń saraptaýynsha, eskertkishtiń bıik taýlar men kólderge jaqyn ornalasýy men tabylǵan jádigerlerdiń túrleri qurylystyń ǵuryptyq ǵıbadathana retinde qoldanylǵanyn kórsetse, tas quraldar eginshiliktiń, atap aıtqanda, egin jınaýdyń damyǵan úrdisin kórsetedi.
Ǵalymdar aldaǵy ýaqytta da eski dáýir eskertkishterin zerdeleı otyryp, elimizdiń ár óńirindegi tarıhı nysandarda arheologııalyq qazba jumystaryn júrgizýdi júıeli túrde jalǵastyrýdy josparlap otyr.