Ertis-Baıan óńirinde kúzgi ańshylyq maýsymy bastaldy. Aýmaqtaǵy 38 ańshylyq sharýashylyǵynyń 28-inde ań aýlaýǵa ruqsat etilgen. Bıyl qustar boıynsha 28 092 úırekke, 2 034 qazǵa, 2086 qasqaldaqqa, 1 179 qurǵa kvota qarastyrylyp otyr.
31 tamyzdan 30 qarashaǵa deıin qaz, úırekti, qasqaldaqty, 1 qyrkúıek – 15 qarasha aralyǵynda borsyqty, 15 qyrkúıekten 30 qarashaǵa deıin qurdy, 2 qyrkúıekten 30 qarashaǵa deıin shildi, 2 qyrkúıek – 31 jeltoqsan aralyǵynda jabaıy shoshqany, 15 qyrkúıekten 31 jeltoqsanǵa deıin Sibir eliginiń analyǵy men laqtaryn, 1 qarashadan 2025 jyldyń 15 aqpanyna deıin qoıan, túlki, qarsaqty aýlaýǵa ruqsat beriledi. Al ıtpen jáne jyrtqysh qustarmen saıatshylyq jasaıtyndar úshin qoıan, túlki, qarsaq aýlaý kezeńi 15 qazannan 2025 jyldyń aqpan aıyna deıin dep kórsetilgen.
«Bekitilgen kvotaǵa sáıkes, 28 092 úırek, 2 034 qaz, 2 086 qasqaldaq, 1 179 qur aýlaýǵa ruqsat etilgen. Buǵan qosa 130 qaraquıryq, 194 borsyq, 1 730 sýyr, 5 212 qoıan, 354 túlki, 87 qarsaq, 12 jabaıy shoshqa jáne 161 elik kvotaǵa endi. Kúzgi-qysqy ańshylyq maýsymy oblys aýmaǵyndaǵy 38 ańshylyq sharýashylyǵynyń 28-inde ruqsat etiledi. 10 ańshylyq sharýashylyǵynda kvota bólinbegendikten jáne rezervtik qorda turǵany sebepti, ań aýlaýǵa tyıym salynǵan. Sondaı-aq «Qyzyltaý» zoologııalyq qoryǵy, Baıanaýyl ulttyq tabıǵı parki, «Ertis ormany» rezervatynda, «Ertis ózeniniń jaıylmasy» qoryǵynda ańshylyq júrgizýge qatań tyıym salynǵan», deıdi Pavlodar oblystyq orman sharýashylyǵy jáne janýarlar dúnıesi aýmaqtyq ınspeksııasynyń basshysy Rýslan Tólepbaev.
Mamandar eskertkendeı, ańshylyqqa shyqqan adamda ańshy kýáligi, ańshylyq sharýashylyǵy sýbektisiniń joldamasy nemese janýarlar dúnıesin paıdalanýǵa ruqsattama, qarý saqtaýǵa jáne alyp júrýge ruqsattama, jyrtqysh qustarmen nemese ıttermen ań aýlaý kezinde olarǵa tıisti tólqujattar bolýy kerek. Maýsymdyq joldamanyń ortasha quny 14 myń teńgeden bastalady.
Janýarlardy zańsyz aýlaǵany nemese ańshylyq erejesiniń talaptaryn buzǵany úshin ákimshilik jáne qylmystyq jaýapkershilik qarastyrylǵan. Qustar men qylshyqty janýarlardyń bir danasy úshin keltirilgen zalalǵa 5 aılyq eseptik kórsetkish, tuıaqty janýarlarǵa 7,5-ten 750 aılyq eseptik kórsetkishke deıin aıyppul kózdelgen.
Al arnaıy qorǵalǵan aýmaqtarda ańshylyq jasaǵandardyń isi qylmystyq áreketke teńestirilip, bas bostandyǵynan aırylady. Jýyqta pavlodarlyq qos ańshy Ertis ózeniniń jaıylmasynda, jabaıy ańdardy aýlaýǵa tyıym salynǵan jerde elikti jaıratyp tastaǵan. Etin alyp ketkeli turǵan jerden tártip saqshylary qolǵa túsirdi. Oblystyq qylmystyq ister jónindegi mamandandyrylǵan aýdanaralyq soty Qylmystyq kodekstiń 337-baby 4-bóliginiń 1-tarmaǵy boıynsha «Erekshe qorǵalatyn tabıǵı aýmaqta aldyn ala sóz baılasý arqyly bir top adamdar atys qarýyn qoldana otyryp, zańsyz ańshylyq jasady» dep aıyptalǵan eki azamatqa qatysty qylmystyq isti qaraı kelip, birin úsh, ekinshisin tórt jylǵa sottap jiberdi. Sottalýshylar qylmystyq áreketteri arqyly memleketke 2,7 mln teńgeden astam zalal keltirgen.
Pavlodar oblysy